Azan shaqyrý (namazǵa shaqyrý) musylman dástúriniń ajyramas bóligi bolyp tabylady. Degenmen sońǵy ýaqytta Qazaqstan Respýblıkasynyń Din isteri jáne azamattyq qoǵam mınıstrligine meshitterdegi azannyń dybys deńgeıin retteýge qatysty kóptegen ótinishter  kelip túsýde.

Osy turǵyda Din isteri komıteti Qazaqstan musylmandary dinı basqarmasymen jáne oblystardyń, Astana men Almaty qalalary Din isteri jónindegi basqarmalarmen birlesip, meshitterdegi azannyń dybys deńgeıin turǵyn úı jáne basqa úı-jaılardy, qoǵamdyq ǵımarattardy ustaýǵa jáne paıdalanýǵa arnalǵan sanıtarlyq-epıdemıologıalyq talaptarǵa sáıkestendirý maqsatynda túsindirý jumystaryn  júrgizýde.

Atalǵan talaptarǵa sáıkes, páterlerdiń bólmelerine shýdyń ený normalary saǵat tańǵy 7.00 den túngi 23.00-ge deıin 55-ten 70 dBA (desıbel), al, saǵat 23.00 den 7.00-ge deıin  45-ten 60 dBA(desıbel) bolý qajettigi kórsetilgen.

Óz kezeginde, Qazaqstan musylmandary dinı basqarmasy Din isteri jáne azamattyq qoǵam mınıstrliginiń usynymdaryn jáne azannyń dybys yrǵaǵyn asyrmaýǵa qatysty sanıtarlyq-epıdemıologıalyq talaptardy ustanady.