«Astana qalasynyń 20 jyldyǵy jaı ǵana kúndelikti toılanatyn meıram emes. Bul – úlken sheshim qabyldanyp, jaýapkershilik júgin arqalaǵan kún. Sol ýaqytta Keńes úkimeti kúırep, el irgesin túzeı almaı jatqanda Astanany aýystyrý jaǵy asa bir salmaqty oı bolyp kórinbegeni ras. Dese de jıyrma jyl ishinde bul tańdaýdyń durys bolǵanyn ýaqyttyń ózi dáleldep berdi». «El-shejire» qoǵamdyq qorynyń tóraǵasy Dáýlet Áshimhan «Astana – qalyptasqan memlekettiń elordasy» atty dóńgelek ústeldi osylaı ashyp berdi.

Jıynda elimizdiń júregine aınalǵan shahardyń keshegisinen búginge deıingi baǵyndyrǵan belesteri men jetken jetistikteri baıandaldy.

Atalmysh sharaǵa «Aqıqat»  jýrnalynyń bas redaktory Amanhan Álim, saıasattanýshy, tarıh ǵylymdarynyń doktory Ázimbaı Ǵalı, Ál-Farabı atyndaǵy QazUÝ profesory, tarıh ǵylymdarynyń doktory Táttigúl Qartaeva syndy birqatar qoǵam qaıratkerleri jáne jastar qatysty.

Alǵashqy sózdi alǵan Amanhan Álim «Biz elsiz, jersiz, memleketsiz eshkim emespiz. Eýropa da, Azıa da emespiz. Keń dalasy men tamasha tabıǵaty bar qarapaıym qazaqpyz. Taǵdyrymyz orys tarıhymen tyǵyz baılanysty. Olar da astanasyn 4 ret aýystyrsa, bizde 4 ret kóshirgen ekenbiz. Elordany aýystyrý ádet-ǵuryp, salt-dástúr, azamattyq qarym-qatynasty qaıta ornatyp, atmosferany ózgertý bolyp tabylady. Iaǵnı etegimizdi jaýyp, orystanyp ketken ultymyzdy qazaqylandyrý edi», – dep atap ótti. Sondaı-aq, «Bul árıne N.Á.Nazarbaevtyń myqtylyǵy men saýattylyǵynyń arqasynda. Mundaı sheshimdi ekonomıkalyq qıyndyq týyp, jańadan táýelsizdikke qol jetkizgen ýaqytta qabyldady. Ózge memleketter tań qalyp, artymyzdan kóptegen sózder de aıtty. Júkti jumyla kótergenniń arqasynda osy kúnge jettik. Sol sebepti de saýatty bolaıyq. Kózi ashyq, kókiregi oıaý adam ǵana jaqsy men jamandy, dos pen dushpandy ajyrata alady. Oqyǵan adam eli men jerin qorǵaýǵa, damytýǵa kelgende óz paıdasyn artyǵymen tıgizetin bolady», – dep jastardy jigerlendirip, bilimdi bolýǵa shaqyrdy.

Al Ázimbaı Ǵalı «Búgingi kúni astanada 1 mln-nan asa turǵyn bar. Ol jaqtaǵy qazaqtyń úlesi Almatydan joǵary. Buryndary basqa oblystan kelgender Elordanyń sýyǵyna shydaı almaı qaıta kóship ketken bolatyn. Dese de qazir Astana ońtústikten kelgen turǵyndardyń arqasynda qazaqylanǵan. Búginde Elbasy ekonomıkalyq, áleýmettik saıasatty sátti júrgizip,  reformany jandandyryp keledi. Halyqtyń keıde qarsy pikir aıtyp turǵany da durys. Áıtpese memleket damymaıdy. Óıtkeni kez-kelgen dúnıege eki jaqty qaraý kerek. Allaǵa shúkir qazir Elbasy men sonyńan ergen halqy birigip jumys istep, beıbit zamanda kún keship jatyr», – dep sózin túıindedi.

Jıyn sońynda stýdentter qonaqtarǵa suraqtar qoıyp, tushymdy jaýaptar aldy. Keshegi men búgingini saralap bergen qatysýshylar jastardan óz aqyldaryn da aıamady. «Biz qalyptastyryp bergen Astanany ary qaraı qalaı damytamyz dep oılanyp, áreket jasaýlaryń kerek», – dep is-sharany qorytyndylady.

Aıta keteıik, dóńgelek ústeldi Almaty qalasy İshki saıasat basqarmasy men «El-shejire» qoǵamdyq qory uıymdastyrdy.