Kóktemgi ásker qataryna shaqyrý naýqany barysynda Almaty oblysynan 1991-2000 jyly týylǵan 1800-den astam azamatty ásker qataryna shaqyrý josparlanǵan. Búgingi kúni 1500-ge jýyq shaqyrylýshy ásker qataryna alynyp, óz boryshtaryn óteýge kirisip te ketti.

Almaty oblysy Qorǵanys isteri jónindegi departamentinen kezekti 50 ulan Otan aldyndaǵy boryshyn óteý úshin Qaraǵandy qalasynda ornalasqan QR İİM Ulttyq Ulanǵa qarasty 5451 áskerı bólimine saltanatty túrde attandyryldy. Saltanatty sharaǵa Qorǵanys isteri jónindegi departamentiniń basshylyǵy, Qarýly Kúshteriniń ardagerleri, QR İİM Ulttyq Ulannyń ókilderi, sondaı-aq áskerge qabyldanýshylardyń ata-analary men týǵan-týystary qatysyp, aq tilekteri men jyly lebizderin bildirdi.

Almaty oblysy Qorǵanys isteri jónindegi deparatmenti bastyǵynyń mindetin ýaqytsha atqarýshy podpolkovnık Talǵat Dáýlethanov áskerge attanýshy ulandarǵa qurmet kórsetý maqsatynda «Shaqyrylýshylar kúni» atty áskerı-patrıottyq aksıasyn dástúrli túrde ótkiziletinin jetkizdi.

- Almaty oblysynan ásker qataryna alynǵan jastar búginde Qarýly Kúshterdiń ár salasynda áskerı boryshtaryn abyroımen ótep keledi. Áskerı bólim komandırleri Jetisý jastarynyń jigeri men qaırattylyǵyna, dene daıarlyǵyna, áskerı tehnıkany meńgerýdegi zerektigine tańdanys bildirip jatady. Otan aldyndaǵy boryshty adal atqaryp, elge abyroımen aman-esen oralýlaryna tilektespin, - dep atap ótti polkovnık Talǵat Dáýlethanov.

Ústimizdegi jyldyń naýryz aıynan bastalǵan kóktemgi ásker qataryna shaqyrý naýqany maýsym aıynyń sońyna deıin jalǵasady. Almaty oblysynan shaqyrylǵan jastar QR UQK Shekara qyzmetiniń, QR Memlekettik kúzet qyzmetiniń, QR Qarýly Kúshteriniń, QR İİM Ulttyq Ulannyń áskerı bólimderine áskerı boryshtaryn óteýge attandyrylýda.

Jergilikti áskerı basqarý organdarynyń, densaýlyq saqtaý jáne qurylymdyq kúshterdiń ókilderinen quralǵan shaqyrý jáne medısınalyq komısıasy áskerge qabyldanýshylardy túbegeıli tekserýden ótkizedi. Komısıa músheleri ár úmitkerdi dara qarastyryp, alǵan bilimin, mamandyǵyn, otbasy jaǵdaıyn, qyzyǵýshylyqtaryn, sporttaǵy jetistikterin nazarǵa ala otyryp, densaýlyq jaǵdaıyna qaraı merzimdi ásker qataryna qabyldaý týraly sheshim shyǵarady.