«Áleýmettik medısınalyq saqtandyrý qory» KEAQ-nyń Astana qalasy boıynsha fılıalynyń  málimeti boıynsha 2018 jyldyń 1-shi maýsymyna qaraı medısınalyq mekemelerge 1 mln 056 myń adam tirkeldi. Jumys berýshiler aı saıyn 532,5 myń adam, ıaǵnı elorda turǵyndarynyń 50 paıyzy úshin jarna aýdardy.    

Sońǵy 11 aı ishinde Astana qalasynyń turǵyndary mindetti áleýmettik saqtandyrý úshin 9 122,6 mln teńge kóleminde aýdarymdar jasady. Bul somanyń 7 869,4 mln teńgesi nemese 86,2% jumys berýshilerdiń qaramaǵyndaǵy qyzmetkerleri úshin jasaǵan tólemderi, al qalǵan 1253,2 mln teńge (13,8%) – jeke kásipkerler men azamattyq-quqyqtyq negizde eńbek etetin tulǵalarǵa tıesili.

Astana qalasy boıynsha qazirgi tańda medısınalyq kómek kórsetýden úmitker densaýlyq saqtaý sýbektileriniń derekqoryna 115 densaýlyq saqtaý uıymy tirkeldi. Onyń 42 memlekettik jáne 73 jeke menshik medısınalyq uıym. Bıyl elordalyq 79 medısınalyq mekeme kepildendirilgen tegin medısınalyq qyzmet kólemi sheńberinde qyzmet kórsetýge ótinish berdi. Bul mekemelermen Qor medısınalyq qyzmet kórsetý týraly kelisimshart bekitti.

2018 jyly densaýlyq saqtaý júıesin qarjylandyrýǵa respýblıkalyq búdjetten 917 mlrd teńge kóleminde qarjy bólindi, onyń 318 mlrd teńgesi ambýlatorlyq-polıklınıkalyq kómekke jumsalady, al basymdyq aýrýdyń aldyn alý sharalaryna beriletin bolady.

2018 jyldan beri Áleýmettik medısınalyq saqtandyrý qory  memlekettik tapsyrys sheńberinde medısınalyq qyzmetterdi satyp alatyn biryńǵaı qarjylyq operator bolyp tabylady,osyǵan baılanysty jańa erejeler men aqparattyq júıeler engizilip jatyr. Atqarylyp jatqan jumystar mindetti áleýmettik medısınalyq saqtandyrý júıesine kezeń-kezeńmen ótýge baǵyttalǵan sharalar.

Jalpy, Astana qalasynda densaýlyq saqtaý júıesin qarjylandyrý máselesi josparly túrde sheshilip jatyr. Medısına mekemelerine jyl basynda málimdelgen qarjylandyrý kóleminiń 30 paıyzy avans retinde tólendi.  Qor medısınalyq uıymdarǵa josparly tólemderdi normatıvtik-quqyqtyq negizderge sáıkes aýdaryp jatyr.