Qazaqstan Prezıdenti Nursultan Nazarbaev qazaqstandyqtardy Oraza aıt merekesimen quttyqtady, dep habarlaıdy Qamshy.kz aqparat agenttigi. 

"Qurmetti otandastar! Barshańyzdy kúlli álem musylmandary úshin aıryqsha qasterli meıram - Oraza aıt merekesimen shyn júrekten quttyqtaımyn!

Qasıetti Ramazan aıy - rýhanı jańarýdyń sımvoly. Bul kezde adamdar meıirimdilik, izgilik, tatýlyq pen kelisim sıaqty biregeı qundylyqtarǵa bet buryp, árkim óziniń áreketi men  ózgelerge qarym-qatynasyn qaıta bir saralaıdy. 

Rýhanı jańaryp, jańǵyrýǵa talpyný bárimiz úshin mańyzdy jáne ol qazirgi qazaqstandyq qoǵam aldyndaǵy mindetterge neǵurlym saı keledi. Biz erte zamannan ozyq ǵylym men bilimdi damytýǵa jol ashyp, adamdardy ózderin jetildirýge jáne úndestikte ómir súrýge bastap kele jatqan qasıetti ıslamnyń jasampaz rólin kádege jarata bilýimiz kerek.

Osy mereke kúnderi árbir musylman jaqsy ister jasaýǵa, jaqyndaryna qýanysh syılap, muqtaj jandarǵa kómektesýge tyrysady.

Osyndaı izgi nıetter men ıgilikti ister elimizdiń birligi men tutastyǵyn saqtaýǵa zor septigin tıgizetin bizdiń ulttyq biregeıligimizge negiz bolýda.   

Shýaqty Oraza aıt merekesinde barshańyzǵa zor densaýlyq, amandyq jáne baq-bereke tileımin!", - delingen Memleket basshysynyń quttyqtaýynda.