Reseı federasıasyna sapary aıasynda Qazaqstan Prezıdenti Qazan federaldyq ýnıversıtetine bardy, dep habarlaıdy Qamshy.kz aqparat agenttigi Aqordaǵa silteme jasap.

Prezıdent Reseıge saparyn keshe Máskeýden bastaǵan bolatyn. Qazaqstan prezıdenti Máskeý qalasyna jumys sapary aıasynda fýtboldan 2018 jylǵy álem chempıonatynyń ashylý rásimine qatysyp, týrnırdiń Reseı Federasıasy men Saýdıa qurama komandalary arasyndaǵy birinshi oıynyn áriptesterimen birge kórgen bolatyn. Odan soń Memleket basshysy Nursultan Nazarbaev Tatarstan Respýblıkasynyń Prezıdenti Rýstam Mınnıhanovpen kezesýge Qazanǵa keldi.

Búgin bilim ordasyndaǵy oqytýshy-professorlar quramymen kezdesýdiń aldynda Nursultan Nazarbaev Qazan qalasynda oqyp jatqan Qazaqstan stýdentterimen áńgimelesti. Memleket basshysy jas qazaqstandyqtarǵa tolaǵaı tabys tilep, zor jetistikterge jetýlerine nıettestik bildirdi.   

Memleket basshysyna Qazan federaldyq ýnıversıtetiniń Qurmetti profesory ataǵy berildi.

Reseı Federasıasynyń jetekshi oqý oryndarynyń biri sanalatyn ýnıversıtet ujymyna arnalǵan sózinde Qazaqstan Prezıdenti bilim ordasynyń akademıalyq jáne ǵylymı bazasy myqty ekenin, sondaı-aq onyń ınovasıalar salasyndaǵy naqty jetistikterin atap ótti.  

– Tarıhı derekterge sáıkes, Qazan ýnıversıtetinde 1877 jyldan bastap qazaq ıntellıgensıasy da bilim ala bastaǵan. Oqý ornynyń Qazaqstanmen tarıhı baılanysy búginge deıin jalǵasyp kele jatqany qýantady. Qazirgi ýaqytta munda túrli mamandyq boıynsha 500-den astam qazaqstandyq stýdent oqıdy, – dedi Nursultan Nazarbaev.

Memleket basshysy Qazaqstan men Reseıdiń 25 jyldyq dıplomatıalyq qatynastary kezeńinde eki jaqty saıası jáne ekonomıkalyq yntymaqtastyq úlgi bolarlyq dárejege jetkenin atap ótti.

– Tyǵyz yntymaqtastyǵymyzdyń arqasynda TMD keńistiginde jańa ıntegrasıalyq birlestik – Eýrazıalyq ekonomıkalyq odaq paıda boldy, – dedi Qazaqstan Prezıdenti.

Nursultan Nazarbaev Qazaqstan men Tatarstan arasyndaǵy yntymaqtastyqty Astana men Máskeýdiń strategıalyq seriktestiginiń mańyzdy elementi dep atady.  

– Qazaqstan úshin baýyrlas tatar halqynyń orny erekshe. Bizdiń tarıhı tamyrymyz ortaq, tilimiz, ádet-ǵurpymyz ben salt-dástúrimiz uqsas. Elderimiz arasyndaǵy tarıhı dostyq dánekeri Qazaqstan men Tatarstannyń qazirgi kezeńdegi yntymaqtastyǵy úshin berik negiz bolyp otyr, – dedi Memleket basshysy.      

Nursultan Nazarbaev eki mádenıet pen halyqty jaqyndastyra túsý isinde tatar dıasporasy mańyzdy ról atqaratynyna nazar aýdardy.

Qazaqstan Prezıdenti Tatarstan Respýblıkasymen birlese júzege asyrylyp jatqan jobalar jóninde aıtty.

– Biz mashına jasaý, munaı hımıasy, áskerı-tehnıkalyq jáne kólik-logıstıkalyq yntymaqtastyq salalarynda túrli ınvestısıalyq jobalardy birlese iske asyryp kelemiz. Bizdiń elordalarymyz – Astana men Qazan arasynda baýyrlastyq baılanys ornaǵan, al Almaty men Qazan seriktes qalalar sanalady, – dedi Memleket basshysy.

Nursultan Nazarbaev Qazaqstannyń sıfrlandyrý jáne tehnologıalyq revolúsıa jaǵdaıyndaǵy ekonomıkalyq damý úderisi jóninde aıtty.

Memleket basshysy adamı kapıtaldyń áleýetin arttyrý jáne ıntellektýaldy ult qalyptastyrý úshin Qazaqstan tarapynan atqarylyp jatqan jumystar jóninde keńinen áńgimeledi. 

Sonymen qatar, Nursultan Nazarbaev «Tildiń úshtuǵyrlylyǵy» jobasynyń iske asyrylý barysy jáne elimizdiń orta bilim berý júıesine İT-tehnologıalardy engizý jóninde aıtty.   

Memleket basshysy búginde Qazaqstanda halyqaralyq baǵdarlamalardyń talaptaryna sáıkes balalardy jaratylystaný-matematıka pánderi boıynsha oqytýǵa baǵdarlanǵan 20 zıatkerlik mektep salynǵanyn atap ótti.

– Indýstrıalyq-ınnovasıalyq damý úderisiniń talaptaryn eskerip, tehnıkalyq jáne kásibı bilim berý isiniń qurylymy men mazmuny jańǵyrtylýda. Qazaqstanda álemdik deńgeıdegi joǵary oqý orny sanalatyn «Nazarbaev Ýnıversıtetiniń» salynýy elimizdiń joǵary bilim berý salasyndaǵy eń iri jáne mańyzdy jobasyna aınaldy. Bul – halyqaralyq standarttarǵa, derbestik jáne akademıalyq erkindik qaǵıdattaryna sáıkes jumys isteıtin Qazaqstandaǵy alǵashqy ýnıversıtet, – dedi Qazaqstan Prezıdenti.

Nursultan Nazarbaev qazaqstandyqtarǵa álemniń úzdik ýnıversıtetterinde bilim alýǵa múmkindik bergen «Bolashaq» baǵdarlamasynyń nátıjeleri jóninde de áńgimeledi.      

Memleket basshysy Qazaqstan men Reseı arasyndaǵy tatý kórshilik pen dostyq qatynastardy nyǵaıtý qajettigine nazar aýdaryp, bul máselede jastar mańyzdy ról atqaratynyn atap ótti.  

Osyǵan oraı Nursultan Nazarbaev Astana men Máskeý yntymaqtastyǵyn odan ári ilgeriletý úderisine eki eldiń óskeleń urpaǵyn belsendi túrde tartýdy kózdeıtin birqatar is-shara uıymdastyrýdy usyndy.

– Qazaqstan men Reseıdiń jas kóshbasshylarynyń forýmyn uıymdastyrýdy usynamyn. Bul basqosý jastarǵa memleketterimizdi damytýdyń ózekti máselelerine qatysty óz oılaryn ortaǵa salýǵa jáne naqty usynystar ázirleýge  múmkindik beredi. Sondaı-aq, mádenı baılanystarǵa tyń serpin berip, elderimizdiń daryndy jáne shyǵarmashyl jastaryna qoldaý kórsetý maqsatymen jas oryndaýshylardyń, sýretshiler men mýzykanttardyń jyl saıynǵy baıqaýlaryn ótkizýdi jandandyrý kerek, – dedi Memleket basshysy. 

Qazaqstan Prezıdenti sport salasyndaǵy yntymaqtastyqty da nyǵaıtý qajettigin atap ótti.

– Bizdiń jas sportshylarymyz arasyndaǵy baılanystar ózekti bolyp sanalady. Eki el jastarynyń arasynda turaqty túrde týrnırler ótkizýdi stýdentter qaýymy qoldaıdy dep oılaımyn, – dedi Nursultan Nazarbaev. 

Sońynda Memleket basshysy Qazaqstan-Tatarstan dostyǵy men ózara túsinistiginiń izgi dástúri halyqtarymyzdyń ıgiligi úshin jalǵasyn taýyp, nyǵaıa beretinine senim bildirdi. 

Qurmetti profesor ataǵyn berý rásimi aıaqtalǵan soń Qazaqstan Prezıdenti Qazan federaldyq ýnıversıtetiniń Qurmetti qonaqtar kitabyna qoltańba qaldyrdy. 

Aıta ketetin bolsaq, Sapar barysynda eki el arasyndaǵy saýda-ekonomıkalyq jáne ınvestısıalyq yntymaqtastyq máselesi jan-jaqty talqylandy. Aldaǵy ýaqytta Qazaqstan men Tatarstan arasyndaǵy taýar aınalymyn 1 mıllıard dollarǵa deıin ulǵaıtýǵa nıetti.