Úkimet basshysy Baqytjan Saǵyntaev Shýdaǵy poıyz apatynan qaza tapqan balanyń jaqyndaryna kóńil aıtty, dep jazady Qamshy.kz aqparat agenttigi.

Premer-mınıstr Qaraǵandy oblysynyń ákimdigi men «Qazaqstan temir joly» basshylyǵyna balanyń otbasyna qajetti kómek kórsetilýin tapsyrdy.

«Densaýlyq saqtaý mınıstrligi zardap shekkenderdiń sapaly emdelýin qadaǵalasyn. İshki ister mınıstrligi men Investısıa jáne damý mınıstrligi, QTJ Ulttyq komanıasymen jáne ózge de memlekettik organdarmen birigip vagondardyń aýdarylý sebebin anyqtasyn, túpkilikti tergeý júrgizsin. Tergeý barysyn ózim baqylaıtyn bolamyn. Qanat Qalıuly (Alpysbaev – «Qazaqstan temir jol» UK» AQ basqarma basshysy), tergeýdi sońyna deıin jetkizińiz» , - dedi Baqytjan Saǵyntaev jıyn barysynda.

Sonymen qatar úkimet basshysyna zardap shekkenderdiń sany habarlandy.

«Apat saldarynan 23 jolaýshy zardap shekti, bir adam qaıtys boldy. Taǵy bireýiniń aıaǵy synyp, aýrýhanaǵa jatqyzyldy», - dedi Qanat Alpysbaev.

Alpysbaevtyń aıtýynsha, kompanıa qaza bolǵan jetkinshektiń otbasyna tıisti kómekti kórsetip jatyr. QTJ Ulttyq kompanıasy onyń otbasyna 1 000 MRP kóleminde ótemaqy tólenedi. Sonymen qatar aýyr túrde zardap shekkenderdiń emine bir mıllıon teńgege deıin tóleý týraly sheshim shyqty.

Aıta keteıik, budan buryn Shýdaǵy poıyz apaty saldarynan qaza tapqandardyń bary jaıly aqparat tarady. Qaza tapqan 12 jastaǵy balanyń denesi týǵan jerine jetkizildi. Alekseı Melnev Qaraǵandy oblysynda búgin jer qoınyna tapsyrylady. Al apattan zardap shekken taǵy bir jolaýshyǵa keshe ota jasaldy. 48 jastaǵy Astana turǵynynyń hali qazir jaqsy. Poıyzda bolǵan jolaýshylardyń 10-nan astamy dárigerge qaraldy.

17 maýsymda saǵat 13:25 shamasynda Sary-SHaǵan - Shý stansıasynda Astana-Almaty baǵytyndaǵy jolaýshylar poıyzynyń 8 vagony relsten shyǵyp ketken bolatyn. Keshe poıyz júrgizýshisi ustaldy.