"Qytaıdy aramdyqpen saýda jasaýdan bas tartýǵa, óz naryǵyn amerıkalyq taýarlarǵa ashýǵa jáne Qytaımen teńgermeli saýda qatynasyn ornatýǵa májbúrleýdiń jańa sharalary qabyldanady" dedi AQSH prezıdenti Donald Tramp.

Qytaı Saýda mınıstrligi Tramptyń sózine jedel jaýap qatyp, ony "bopsalaý ádisin" qoldanyp otyr dep aıyptady jáne "shekten tys qysymǵa qatań jaýap beretinin" eskertti.

Donald Tramp Qytaı bıliginiń amerıkalyq ıntellektýaldyq menshik quqyǵyn qorǵaýdan bas tartyp otyrǵanyna narazy.

Ótken aptada Tramp ákimshiligi Qytaıdan ımporttalatyn 50 mıllıard dollardyń taýaryna 25 paıyzdyq baj salyǵyn salatynyn habarlaǵan. Pekın AQSH-ty "saýda soǵysyn júrgizip otyr" dep aıyptap, birden amerıkalyq 50 mıllıard dollardyń taýaryna, onyń ishinde astyq, avtomobıl jáne teńiz ónimderine baj salyǵyn engizgen.

AQSH-tyń Qytaıdan jetkiziletin 34 mıllıard dollardyń 800-den astam taýar túrine salatyn baj salyǵy 6 shildeden bastap kúshine enedi. Taǵy 300-deı taýarǵa salyq salý máselesi ázirge talqylanyp jatyr.

Álemdik jetekshi qor naryqtarynda sońǵy kúnderi AQSH pen Qytaı arasyndaǵy saýda-ekonomıkalyq eges halyqaralyq dıstrıbútorlyq júıe jumysyn toqyratýy múmkin degen qaýipten aksıalar baǵamy tómendep jatyr.