Astana-Almaty poıyzy shyǵyp ketken ýchaskedegi temir joldar bıyl 6 maýsym kúni tekseristen ótti, dep habarlaıdy 24.kz.
Al mashınıst ruqsat berilgen jyldamdyqty asyrǵan joq. Bul týraly «Qazaqstan temir joly» kompanıasynyń tóraǵasy Qanat Alpysbaev Úkimet qabyrǵasynda málimdedi. Onyń habarlaýynsha, oqıǵanyń sebebi júk jáne jolaýshylar poıyzdarynyń soqtyǵysýy emes. Saraptama júrgizý úshin Tynyshbaev atyndaǵy kólik jáne komýnıkasıa akademıasy jáne Búkilreseılik temirjol kóligi ǵylymı zertteý ınstıtýtynyń mamandary jumyldyryldy.
Qanat Alpysbaev, «Qazaqstan temir joly» UK» AQ basqarma tóraǵasy:
- Qazirgi tańda komısıa oqıǵa bolǵan orynnyń ınfraqurylymdyq jaǵdaıyn tekserip jatyr. Qajetti ólshemder jasalady. Bolashaqta mundaı oqıǵalardyń aldyn alý úshin tıisti sharalardy qabyldaımyz. Maýsym aıynyń sońyna deıin komısıa óz jumysyn aıaqtaıdy. Temirjoldaǵy qaýipsizdik deńgeıin baqylaýdy kúsheıtemiz.
