Qytaı kınokompanıasy qazaqstandyq ánshi Dımash Qudaıbergen týraly fılm túsirýdi josparlap otyr. Bul týraly shyǵarmashylyq jáne ǵylymı forým jıynynda Qazaq óner ulttyq ýnıversıtetiniń rektory Aıman Musaqojaeva habarlady.

«Biz bıyl «Eýrazıa» kınofestıvaline keletin BJ Brothers kompanıasymen birlesip jumys isteımiz. Kompanıa Qazaqstannyń tanymal ánshisi Dımash Qudaıbergen jaıly fılm túsirýdi josparlap otyr. Dımash jaıly fılm túsirý ıdeıasyn Kann festıvali barysynda festıvál basshysymen aqyldasqan edik», - dedi Musaqojaeva.

Fılmniń konsepsıasy, janry, sújeti ázirge belgisiz. Rektordyń aıtýynsha, Dımash Qudaıbergen bıyl óner ýnıversıtetiniń dıplomyn alyp, elordadaǵy bitirý keshine barady. Al ánshiniń týǵan jerine otandastardan bólek sheteldik jankúıerler jınalmaq eken.

Qazaqstannyń halyq ártisi Qytaıdaǵy kıno stýdıalardyń birlesken joba aıasynda jumys isteıtin seriktesterdi izdep júrgenin de habarlady.

Astananyń 20 jyldyǵyna oraı  «Eýrazıa» XIV halyqaralyq kınofestıvali 1-7 shilde aralyǵynda ótpek. Festıválǵa fransýz akteri Vensana Kassel, «Aıka» fılminde basty róldi somdaǵan Samal Eslámova, Slovakıa jáne Serbıa kınorejısseri Emır Kýstýrısa qatysady dep josparlanyp otyr.