Túrkistannyń oblys ortalyǵy atanýy rýhanı jańǵyrýdyń úlken nátıjesi. Mundaı pikirdi Halyqaralyq Túrki akademıasynyń prezıdenti Darhan Qydyráli bildirdi, dep habarlaıdy QazAqparat.

Túrkistannyń rýhanı róli odan saıyn artatyn bolady «Túrkistannyń oblys ortalyǵy atanýy shyn máninde rýhanı jańǵyrýdyń úlken bir nátıjesi dep oılaımyz. Sebebi Elbasynyń «Bolashaqqa baǵdar: Rýhanı jańǵyrý» atty baǵdarlamalyq maqalasynda tarıhı sananyń jańǵyrýy, ulttyq kod jaıynda aıtylǵan bolatyn. Al Túrkistan uǵymy da bizdiń ulttyq kodtarymyzdyń biri. Maǵjan Jumabaev: «Túrkistan - eki dúnıe esigi ǵoı, Túrkistan - er túriktiń besigi ǵoı» dep jyrlaǵan. Iaǵnı, bul tek qana qalanyń ataýy emes, úlken uǵym bolatyn. Búkil túrki álemin biriktiretin ataý edi. Mine, sol ataýdyń qaıta jańǵyryp jatqandyǵy bizdi qýanyshqa bólep otyr», - dedi Darhan Qydyráli.

Onyń aıtýynsha, aǵymdaǵy jyly Maǵjan Jumabaevtyń 125 jyldyǵy atalyp ótpek. Osyndaı ataýly datamen Túrkistan qalasynyń oblys ortalyǵy atanýynyń tuspa-tus kelýi de óte qýanyshty jaǵdaı.

«Jalpy, kezinde Túrkistan Ortalyq Azıanyń ataýy retinde paıdalanylǵan. Túrkistan general gýbernatorlyǵy boldy. Odan keıin Túrkistan óńiri dep ataldy. Endigi ýaqytta Túrkistan oblysy Elbasynyń bastamasymen júzege asyrylyp jatqan Ortalyq Azıa elderiniń de yntymaqtastyǵyna zor serpin beredi dep oılaımyn. Jalpy Túrkistannyń oblys ortalyǵy atanýy tek qana qazaq halqy úshin ǵana emes. Sonymen birge baýyrlas kórshi memleketter úshin de óte qýanyshty jańalyq dep estepteımin. Qutty bolsyn», - dedi Halyqaralyq Túrki akademıasynyń prezıdenti.