«Aq jol»: UBT úshin biz balalarymyzdyń qaýipsizdigine qaýip tóndirsek, munyń sońy tym qymbatqa túspeı me? – Depýtattar uıaly baılanysty buǵattaıtyn qurylǵylardy paıdalanýdy shekteýdi jáne olardy arnaıy qural retinde tanýdy talap etedi.

Eger biz UBT úshin balalarymyzdyń qaýipsizdigine qaýip tóndiretin bolsaq, munyń sońy qymbatqa túspeı me? – dál osyndaı saýalyn Keńes Absatırov úkimettiń atyna joldady. «Aq jol» depýtattary uıaly baılanysty buǵattaıtyn qurylǵylardy paıdalanýdy shekteýdi jáne olardy arnaıy qural retinde tanýdy talap etedi.

Ózderińizge belgili, aqparat pen baılanys salasyndaǵy qyzmetti júzege asyrýǵa nıet bildirgen kez-kelgen tulǵa «Ruqsattar men habarlamalar týraly» Zańda belgilengen tártippen qajetti ruqsatty (lısenzıany) alýǵa mindetti.

Aqparattyq tehnologıalardyń damýy aıasynda uıaly baılanystyń qazaqstandyq operatorlary qyzmet kórsetý aýmaǵyn keńeıtýmen qatar, quqyq qorǵaý organdarynyń tikeleı talaby boıynsha, kerisinshe, uıaly baılanysqa qoljetimdikti shekteı de alady.

Operatorlardan bólek, GSM-sıgnaldy buǵattaý úshin arnalǵan tehnıkalyq qurylǵylardyń kómegimen baılanysty shekteý múmkindigi de bar. Bul qadamdar qaýipsizdikti qamtatasyz etý maqsatynda jedel-izdestirý sharalary kezinde jáne ulttyq qaýipsizdik turǵysynda lańkestik qaterlerdiń aldyn alý barysynda iske asyrylady.

Osy oraıda 2015 jylǵy 27 shildedegi Úkimet qaýlysyna sáıkes, QR Ulttyq qaýipsizdik komıteti jedel-izdestirý sharalaryn júrgizý úshin arnalǵan arnaıy tehnıkalyq qurylǵylardy jóndeý, óndirý boıynsha lısenzıar bolyp belgilengen.

«Aqjoldyqtar» bul sharalar men tıisti shekteýler tolyq negizdi bolyp otyr dep sanaıdy.

Alaıda keıingi kezde uıaly baılanysty buǵattaýshy qurylǵylar UBT ótkizý kezinde bilim berý júıesinde keńinen paıdalanylady. Máselen, memlekettik satyp alýlar portalynda osyndaı «buǵattaýshy» quryldardy satyp alý týraly bilim mekemelerinen ótinimderdi kórýge bolady.

Sonymen birge, búginde saıttar men áleýmettik jelilerde bul «buǵattaýshy» qurylǵylardyń jumys isteý sıpattamasynan bólek, olardy qolaıly baǵamen satyp alý múmkindigi baıqalady.

Qoldanystaǵy zańnama «buǵattaýshy» quraldardy elge alyp kelý, satý jáne paıdalaný boıynsha qandaı da bir normalardy qarastyrmaıdy. Sáıkesinshe, olardy taratýshylar men paıdalanýshylardyń is-qımyldary shektelmegen.

Atalǵan arnaıy qurylǵylar paıdakúnemdik maqsattarda eleýli túrde ekonomıkalyq ári áleýmettik zalal keltirýi yqtımal ekenin Absatırov atap aıtty.

Iaǵnı osy qurylǵylardyń jumys isteý sıpattamasy GSM-sıgnaldy buǵattaýǵa baǵyttalǵandyqtan, bul rette lańkestik qater týyndaǵan kezde qutqarý qyzmetteri men qaýipsizdik qyzmetteri sıgnaldary jumysyna kedergi jasalýy múmkin.

Sonymen qatar tólem termınaldarynyń, bankomattardyń, shuǵyl jaǵdaılarda habar taratý barysynda symsyz júıelerdiń jumystary buzylady.

«Demek, kez kelgen adam atalǵan qurylǵyny tek UBT kezinde mektepterde ǵana emes basqa jerlerde de iske qosyp mańyndaǵy úılerdi baılanystan ajyrata alady. Sonyń ishinde – qutqarý qyzmetteri men qaýipsizdik qyzmetteri sıgnaldary jumysyna kedergi jasaýy múmkin. Eger UBT úshin bizdi balalarymyzdyń ómirine qaýip tóndirýge ıtermeleıtin bolsa, munyń sońy tym qymbatqa túspeı me?», - dep «aqjoldyqtar» óz alańdaýshylyǵyn bildirdi.

Onyń ústine, mundaı jaǵdaılar oryn alǵan kezde baılanys operatorlary jaýapkershilikten bas tartady.

Osyǵan baılanysty, «Aq jol» QDP fraksıasy joǵaryda aıtylǵan uıaly baılanysty buǵattaıtyn qurylǵylardy erkin aınalymǵa shyǵarylmaıtyn jáne naryqta satylmaıtyn arnaıy quraldar retinde belgileý qajet dep esepteıdi. Budan basqa, depýtattar Premer-Mınıstrden osy máseleni tyńǵylyqty zerdeleý jáne osy salany zańnamalyq turǵydan sheshý jóninde sharalar qabyldaý úshin jaýapty qyzmetkerlerge tıisti tapsyrmalar berýin surady.

«Aq jol» QDP jáne onyń parlamenttik fraksıasy saılaýaldy baǵdarlamany júzege asyrý jáne saılaýshylardyń tilegin oryndaý boıynsha jumystardy jalǵastyrýda.