Bul jyrdy 2014 jyldyń aıaǵyna qaraı jazyp, Aqordanyń syrttaǵy poshta jáshigine salyp ketkenmin. Oǵan eshqandaı jaǵympazdyq emes, «Elbasy oqyp, Astanada osyndaı aqynnyń da bar ekenin eskerer» degen jastyq jeliktiń ıtermelegeni ras. Alaıda, 2015 jyldyń qańtarynda Aqordadan poemamdy Nursultan Nazarbaevtyń ózi oqyǵany týraly jaýap hat alǵanda, sol sátke sener-senbesimdi de bilmeı qaldym.
Sonymen, bıyl Astananyń 20 jyldyq mereıtoıy ǵoı. Al «Shah-shahar» atty myna poema osy bas shaharǵa arnalǵan («Shah-shahar» degen taqyrypty «elorda», «handorda», «bas qala» degen sıaqty ataýlarmen úndestirip qoıǵan edim). Sondyqtan da Astana kúnine jasaıtyn qoldan keler bar tartýym – anaý-mynaý emes, Elbasy Nursultan Nazarbaev alǵysyn bildirgen júrekjardy jyrym bolmaq. Marhabat!
Shah-shahar
Álqıssa
Men Astanaǵa Torǵaı óńirinen oń-solymdy tanyp úlgermegen 17 jasymda bilim qýyp kelgen edim. Ol kezde qalanyń el ordasy retinde qurylyp jatqanyna úsh-aq jyl bolǵan. Aqmola tusyndaǵy ábeýqońyr tirlik áli de seziletin. Qudaı ońdap, bedeldi qarashańyraq – L.N. Gýmılev atyndaǵy Eýrazıa ulttyq ýnıversıtetiniń jýrnalısıka kafedrasyna qabyldandym. Stýdent kezimnen bastap elordamyzdyń tili – «Astana aqshamy» gazetinde, úni – «Astana» radıosynda azdy-kópti qyzmet atqardym. Odan keıin de munda birinen soń biri ashylǵan «Nur-Astana», «El» gazetterinde ózindik qoltańbam qaldy...
Qazir kózi qaraqty oqyrmanǵa ájeptáýir tanylyp qalǵan shaǵym. Ózim shyǵystyq áýezben «Shah-shahar» dep at qoıyp alǵan mekenimde otbasyn qurdym. Al qazaqtyń bul bas qalasyna alǵash taban tiregen 2001 jyl men búgingi shaqtyń aıyrmashylyǵy – jer men kókteı. Qaıran, ýaqyt!..
İ
Ón boıyna ór rýhymdy engizgen,
Taǵdyrym men óz órisin teń túzgen
Asqaq shahar!
El tórinde elenip,
Eńselendik biz senimen, sen bizben.
Oı, ekeýmiz qandaı edik burynda?!.
Jupyny-tyn jaı-kúıimiz shynynda.
Aqmola men «aýylbaıdyń» sol sıqy –
Qantúbit qoı, qonyp alǵan tuǵyrǵa!
Kóshe joly – qorytylǵan qorǵaıdaı,
Maza bermes masalaryń – torǵaıdaı.
Kúrkildetip sary «PAZ»-dy, «GAZel»-di,
Oqýǵa kesh jetetinmin oıbaılaı.
Troleıbýs jıi bosap jelińnen,
Sýyrylǵan setineýli senimnen!
Onysynyń tikireıtip qos murtyn,
Sharshap júrer shopyrlary elirgen.
Záýlim úıden jataǵan úı kóp edi,
Kók tútinin kómeılerge kómedi.
Shatyr asty, shym ústinen jyrtıǵan
Terezeni qaqpaıdy jurt, tebedi.
Orda salar oı qabyldap bastary,
Aqshasyzdar aýyldaryn tastady.
Qurylysqa qumyrsqasha qaptap kep,
Saıajaıǵa syǵylysty jas-kári.
Dańǵyldarda sasyq kóbik simirdik,
Trotýar tesigine súrindik.
Jarq-jurq jazý – qos ókpeni ystatyp,
Sátterińe úndeý ǵana búgindik!
Kóńilińdi en qyzyqqa bólemes
Kez kelgen tus – jol apaty, tóbeles.
Omartadaı bazar turdy ortada,
Gý-gý, dý-dý... Onda da joq jón eges!
Eske búkken estelikten zoryǵa,
Bulqynǵan bul aqyn-júrek doly ma?!.
On jetimnen qalǵan syr bar endeshe,
Bissimillá, bir lyqsytsyn ony da!
Jarastyryp júz jýylǵan kıimdi,
Júdeý keıpim jymıysqa beıil-di.
Pák peıil de páterden pás kórmedi,
Dóńgeleksiz vagon deıtin «úıimdi».
Kólkip keıde kókeıdegi nyq tańba,
Kózdi shyńdar jigerimdi myqtaýǵa.
...Qolynda muń móldireıtin anamnyń,
Jasyn sarqyp, oramalyn syqqanda!
Iá, Shah-shahar, bolmasa da baı tanym,
Sondaı-tuǵyn salmaǵyńa saı qaýym.
Joldyń birden ketpegenin dańǵyl bop,
Shyndyǵymnan aýytqymaı aıtamyn!
Sol shaqtardan talaı kúndi qurǵatyp,
Bolyp alǵan kókeıdegi syr jatyq.
Ańyz tyńdap otyrǵandaı alaıda,
Esh pendeniń senbeıtini – bir baqyt!
İİ
Umyttyrmaq bolǵandaı sur shaqtardy,
Kónekózim keıinirek baptandy...
Esildiń sol jaǵalaýy jańadan
İrgetasqa irge jalǵap jatqan-dy.
Tyń arnaǵa ekinshi bir arnadan
Aǵys jasap alǵandaı-tyn bar maman.
Almatydan tek qol júgin ákelip,
Sheneýnik te jataqhana jaldaǵan.
Kóz aldymda kúrt erigen qardaıyn,
Qasań turmys ańǵartty óz aý-jaıyn...
O, Shah-shahar!
İlgerige oza ber,
Túzý baǵyt áserimen árdaıym!
Táýir qylyp tártipsizdik turaǵyn,
Kúngeıli zań ydyratty tumanyn.
Dáleldedi dáýlet, sáýlet dilgirmeı,
Jer úılerdiń eles bolyp tynaryn.
Ádiptep-aq árbir jyldyń ár aıy,
Árin ashty «Báıterektiń» mańaıy.
Jalt-jult etip jerden ósip shyqqandaı,
Dáýirimniń dáý úıler men saraıy!
Menen asyp mekenimiz tuǵyrly,
Kıimdi tez aýystyryp, qubyldy.
Aýdandary – oqalanǵan etek-jeń,
Shoqpyttardan jurnaq ta joq burynǵy.
Táýba! Táýba! Tóre qonar tór ıgi!
Shabytymdy shattyǵyna bóleıdi.
Órkenıet irgesinen jer alyp,
Óz panasyn órgender de kóbeıdi.
Qaı qoǵamdyq kólikterin kórseń de,
Erkin syıar zamanaýı ólshemge.
«PAZ», «GAZel»-diń artta qalǵan jyldaryn
Ótpeli kez deńgeıimen mólsherle!..
Tulǵalarym bilekti hám bilikti,
Tarpańyna tik eńsemen minipti.
Kil kórneki oryndardan nazarǵa
İri-iri músinderi ilikti.
Dombyrasyn, mol murasyn basqa da
Dáriptemes kóshedegi tas qana.
...Alataýdan aqparattyń tasqyny
Kelip jetti, qut bolǵan soń astana!
Erektenip Shah-shaharym eldegi,
Endigine ulttyq ustyn dendedi.
Orystildi ortanyń da alǵashqy
Tońy jibip, seldiredi seńderi.
Kóń etikti kózqarastan arylyp,
Jańarǵanda «jas meken» dep tanydyq.
Basqa jaqqa bara qalsaq birer kún,
Qalamyzdy qalamyz shyn saǵynyp.
***
Bergi betke bettegenshe ótkelden,
Bar bolashaq túlep shyǵar ótkennen.
Jańarǵan óń – asqar syndy kóktemgi,
Asýlary astas jatqan kók belmen.
İİİ
Esil aýdany
Sol jaǵynda jańa qala jaınaǵan,
Syrbaz Esil, qandaı ǵajap aınalań?!
Ózińmenen attas aýdan boı tiktep,
Salmaqtandy saltanatqa baı jaǵań.
Mysaly, ol – kútip kórkem alapty,
Gúldiń ósý sapasyna jaýapty.
Qujynaǵan aralardyń biri – men...
Áne, áıdik bóshkelerden bal aqty!
Sonda túgel eń qadirli esimder,
Mármár minber, keń keńseler, ses, únder.
Esep-qısap, basty-basty bastama,
Jahandyq hám eldik qaýly, sheshimder.
Osaly joq! Qarapaıym kisiń ne?!.
Bári myǵym! Senim kúshi – isinde!
Burqyraǵan qaǵaz ǵana júredi,
Jyltyraǵan shynylardyń ishinde.
Torap bólip toǵysy kóp tuspaldan,
Jańa aýdan jańa baǵyt ustanǵan.
Órkenıet órkeshinde otyryp,
Bir kezi joq uly kóshten tys qalǵan!
Bas Tý
Baıraǵymda – bultsyz aspan bederi,
Jaınaýynda – Kaspııimniń tereńi.
Kún – Azattyq, Qyran – Qazaq.
Al, Oıý –
Ulttyǵymnyń, myqty qunnyń deregi!
Jazýy sol bolǵandyqtan mańdaıdyń,
Keńistikte keregimshe samǵaımyn!
Jańa ǵasyr – qut-bereke bastaýy,
Eski zaman enshisinde zar-qaıǵym!
Óresizder órbitse de qur qańqý,
Aıyp emes aqıqatty bir qamtý.
Asyrýda Aqordamnyń aıbaryn,
Táýelsizdik tuǵyrynda turǵan Tý!
Jelik býyp, jetemin dep entikpe!
Dál ortadan kórinedi eń túpke...
Shah-shahardyń shyraıyna qondyrmaı,
Muqym muńdy jibererdeı jelpip te!
Erlerinen bap tabatyn el mine!..
Eńbeginen baq janatyn er mine!..
El, erimmen maqtanatyn kezim bul,
Qane, Bas Tý, sen jelbire!
Jelbire!
«Máńgilik El»
Dem berilip Deshti Qypshaq desinen,
Órnektelgen Saq, Ǵundardyń sesimen,
Myń ǵasyrlyq myna bizdiń qaqpanyń
Uly Qytaı qorǵanynan nesi kem?!
Qubylaǵa qarsy qarap qalýǵa
Laıyq qalpy sińbeıtindeı saǵymǵa,
Tórt taraptan teń kóringen tórt burysh –
Tórtkúl álem tamsanatyn tanymda.
Derbestiktiń dúnıelik ekenin
Aıǵaqtap bir meniń uly mekenim,
«Máńgilik El» doǵasyna bekidi
Alash jurtyn alǵa tartar jetegim!
Tizgin túspes Kóshbasshynyń qolynan,
Shashaǵa shań jýymaıdy jolynan.
Shah-shaharym – qajymaıtyn qazanat,
Al, bolashaq – berekege toly mań.
...Zar-zamanda bolmaǵandaı áne túk,
Ketpe, ulym, tek shen-baılyq dámetip!
Qyl syzyqtyń qıylmaýyn eske tut,
«Máńgilik El» qaqpasyna táý etip!
«Qazaq eli»
Qazaqy dil, buzylmaǵan qaımaǵy,
Munaranyń usharbasyn jaılady.
Alyp eldiń erkin samǵar sáti ǵoı,
Samuryqtyń kókke qanat jaıǵany!
Jalǵanda kóp jaqsylyqqa tilense,
Tutastyqty túrtpes eshkim túlenshe...
Tek Aqorda mańaıyna úılesti,
Eldigime arnalǵan bul tik eńse!
Kóz aldymda keıiptegen ańyzdy,
Anaý altyn jumyrtqa da mańyzdy!
Qamsyz damyp bıiktegi bolashaq,
Mysy basar aıdahardaı jaýyzdy...
Uly iste etilmeıdi ep únem,
Jarasymdy júıesi tur retimen.
Túp dińgekti nyǵaıtýǵa negiz bop,
Nursultannyń ór tulǵasy bekigen.
Men júrekke taǵy da bir sert býdym:
Ulttyq ilim – tárbıesi tekti uldyń!..
Sen teńdessiz bıiktikti, qulynym,
«Qazaq eli» monýmenti dep bilgin!
«Báıterek»
Bastamasyn elordalyq bar quttyń
«Eskirmeıtin eskertkish» dep qamtyppyn...
Biraq, onyń basynan zor ún qatty,
O, Nesipbek Aıtulynan artyq kim?!
Ulttyq mıften eles berer pishinge
Oımen úńil!
«Jaı nysan» dep túsinbe!..
Darhan eldiń qonaqtary qaptap júr,
«Samuryqtyń jumyrtqasy» ishinde!
«Nurekeńniń alaqanyn qur qalmaı
ustaıyn!» dep keledi bir syr qamdaı.
Qalypqa qol qoıar sosyn qobaljyp,
Sol kisimen amandasyp turǵandaı.
Qaptalynan kún aınalyp, aı qarar,
Jer sharyndaı mundaı ǵajap qaıda bar?!
Qarashyǵyń ár tusynan qadalyp,
Shah-shahardyń tutas kórkin aımalar.
...İrgetastar irilenip yǵynda,
Damýdyń bir satysyna shyǵýda.
Ózi ǵana oqshaýlanyp turmas-aý,
Menen keıin týar aqyn jyrynda?!.
Nazarbaev zıatkerlik mektebi
Ǵylym, bilim órden ótip shektegi,
Keńistikte kemeldikke bettedi.
Tyńnan túren salyp jatyr sol úshin,
Nazarbaev zıatkerlik mektebi!
Ustanymnan «úsh tuǵyrly til» degen
Óngen tamyr tereńderin bilgen em.
Qazaq, orys, aǵylshynsha butaqtar,
Berik dińde teń tynyspen búrlegen.
Sábı shaqtan til meńgergen túlek pen
Baǵban birdeı, baqshasyna gúl ekken!
Kókirektiń kózin ashsa bireýi,
Ekinshisi saýap alar júrekten.
Nazarbaev – ár kózdegi ot uǵym!
Zıatkerlik – toqýlarǵa toq ilim.
Armandaıdy qarapaıym ata-ana,
Balasynyń sol mektepte oqýyn.
Qyrtysyna qonaqtamaı qum, shańdaq,
Jas sanadan turǵan lázim nur saýlap.
Talap ústep, talpynt biraq,
Tastamaı
Qur armannyń qurdymyna qursaýlap!..
Nazarbaev Ýnıversıteti
Shyńdalatyn bilimpazdar eń erek,
Bul jahandyq oqý orny keremet!
...Jegiń kelse balbyraǵan jemisin,
Táýir kórgen tuqymyńdy tereń ek!
Oqý ǵana ańǵarylsa oıymnan,
Balańdy kút, soǵan ózi boı urǵan!
Ozyq orda oń qaraıdy,
Ataýy
Kóshbasshynyń qurmetine qoıylǵan!
Ásirese, aty máshhúr álemge
Ǵulamalar sanasýda ár elde.
Kállásynda kákir bolsa kerdeńniń,
Mansabyńdy mańaılatpas á deýge!
Sara sózge senbe meıli, sen meıli,
Aqıqatty astarlaǵym kelmeıdi:
Shah-shahardyń shyńyndaǵy áz-uıa –
Oksford pen Kembrıdj deńgeıli!
Shyńdalatyn bilimpazdar eń erek,
Bul jahandyq oqý orny keremet!
...İshi tarlar ishten oqyp týsa da,
Moıyndaýǵa odan artyq ne kerek?!
IV
Dóńgelengen dúnıeniń dóp ústi
Shah-shahardan kórdi myna jón isti:
Kúlli dinniń basshylary bas qosyp,
Pátýaly pikirlerin bólisti.
Aramdardan aryltpaqqa ar qunyn,
Mindet etti minájattyń barlyǵyn...
Bir túıilse nanym, tanym tinderi,
Burmalanbas jarıaǵa jar ǵylym!
Búkilqazaq quryltaıy kezinde
Shettegi jurt erik berer sezimge...
El tórinen qushaq ashty olarǵa
Rýshyldyq pen jershildikten meziń de!
Shekaradan ótkenderi tizilip,
Ákeledi myń tilek pen júz úmit.
Ushaqtardan qushaqtarǵa qulaıdy,
Ańsarly shyq ıeginen úzilip.
Jer júzinen quıma qulaq túrilip,
Bizdiń jaqtan kúter sátte irilik,
Eýrazıalyq forýmdaryn ótkizdi
Qos qurlyqtyń tilshileri birigip.
Shah-shahardan shıratylyp aqparat,
Árbir tilden árip tizdi aq paraq.
Tájirıbe almasady mamandar,
Sóz saptaýyn shaqtap, saqtap, jattap-aq!
Bıligimde bekidi de bedel nyq,
Batys, Shyǵys elderine elendik.
Kóregendik tanytyppyz,
Kirgende
Odaqtarǵa Eýrazıalyq, Kedendik!
Beıbit túrde beldi bekem býdyq biz!
Ozyq elder qatarynda turdyq biz!
Ónerkásip, óndirisi damyǵan
Joǵarǵy bir kórsetkishke yrǵyppyz!
Saryarqada sógitilip sál kóbe,
Menmundalap kóringendeı ár tóbe.
Alyp kórme – EXPO-nyń shoqtyǵy
Jalǵady sol mártebege mártebe!
Jańalyqtar júrek kózin qarıtyn –
Túpki túr ǵoı, dáýir saıyn damıtyn!..
Esil tolqyp, nur júzine shyǵardy
Aǵysynda tunǵan asyl tarıhyn!
Shah-shaharym bolǵan saıyn tanymal,
Aq túıeniń qarny árkez jarylar!..
Ol orasan ordasynda elimniń
Jer júzilik ıgiliktiń bári bar!
Hanshaıymdaı júrisi saı árine,
Tez sińisti myna jańa dáýirge.
«Damyǵan el astanasy» atyna
Sáıkes sátter týa berer áli de!
V
El, Elbasy, elordany bir tanym
aıasynda aıalap-aq júr qaýym...
Táýelsizdik týyn súıip tizerleı,
Uly úshtik namysyn men jyrtamyn!
Táýir tilek oryndap Haq – Táńiri,
Jigerlendi árbir aǵa, ár ini...
Qazaq eli – baǵanaly aq orda,
Nuraǵamyz – otaǵasy kánigi!
Bekitip Ol keń kerege, jaqtaýdy,
Shańyraqtan kórdik atqan aq tańdy.
Bosaǵadan ense yrys-yntymaq,
İrgemizde qaýipsizdik saqtaýly!
İshine qut darymaǵan bekerge,
Shah-shahardy shaǵyn otaý eken de!..
Sony serpin, tyń tynys ta osynda,
Tulparlaryn túsirmeıtin tepeńge!
***
Qyzyl odaq qulaǵanǵa deıingi
Bir shyndyq bar, jańǵyrtatyn zeıindi:
Baıandy el, baıtaq jerden kóleńke
Nursultannyń arqasynda seıildi!
Eski tasy domalaǵan tez órge,
Essiz qoǵam er eńsesin ezer me?..
Eńkeımedi erkin oıly qaıratker,
El taǵdyry synǵa túsken kezeńde!
Kókbórishe týra jortar túzbenen,
Saýap boldy, saqtansaq ta biz neden!
Qaısar uldan yǵyp qaldy eriksiz,
Jaýlyq pıǵyl ishten ilik izdegen!
Ústemshil top úlgergenshe qas qaǵyp,
Qamyttaryn qaq aıyryp tastadyq!..
Oryntaqqa otyrǵanda Nursultan,
Jańa dáýir ketti birden bastalyp!
Arttaryna qaldyrmaıtyn esh belgi
Taqqumarlar bul kisige des berdi.
Ata Zańnyń bas avtory bop ózi,
Ata-baba armandaryn eskerdi.
TMD-dan shyǵyp jalǵyz tetigi,
Bizde ǵana Assambleıa bekidi.
Ultaralyq tatýlyqty nyǵaıtý –
Birtutastyq, turaqtylyq kepili!
«Salamatty Qazaqstan» toraby
Jeteledi em, shıpalyq jobany...
Ózimizdiń óndiris pen ónim de
Satyda tur saıasattan joǵary!
Al, mádenı muralarǵa kil kóne
Sáýle tústi, ot tıgendeı piltege.
Myń án, myń kúı...
Babalardyń sózinen
júz tom jınaq shyǵartqany – bir tóbe!
Turmas ómir ǵajaıypty ańsaýdan,
Ońǵarylyp, ol da shyqty qarsy aldan:
Elbasynyń týyndysy – elorda,
Abatyna alty qurlyq tamsanǵan!
Ustynynda – ulttyq naqysh, yrys-baq,
Keshenderi kemeldikti tur ustap.
Baqyttymyn, avtorymen birge men
Júrgendikten bir aýamen tynystap!
Jan-jaǵyna jasyl jelek ornady,
Jerlesterdi jel, borannan qorǵady.
Ideıasyn ısinetin ataýy
Bolý kerek «Nazarbaev ormany»!
Laıyqtymnyń usynysqa osyndaı
Aınalasy – tatý kórshi, dos yńǵaı!
Jany ashyp jalyndaǵan jasqa da,
Talpynysyn qýattaıdy tosylmaı.
Mendik maqsat – jaqsylyqty jasyrmaý,
Jalǵan aıtyp, joǵaryǵa bas urmaý!..
Memlekettik mindetterde shynymen,
Jas mamanǵa jaǵdaı jasaý basymdaý.
Iá, Rabbym, aq óleńdi násip et!
Qara nıet bara jatyr ras údep.
Bosaǵada batyrsynyp otyryp,
Oı jetpeske tildi sozý – qasiret!
Tirisinde tursa turmys turalap,
Tabansyzdyń óz sorynda min, aǵat!
Óte sumdyq, shyǵa kelý bir jandy
Jeke-jeke kiltıpanǵa kinálap!
Saýatsyz syn syrttaı salar tabaǵa.
Salmaqsyz sum, oshaǵyńdy sabama!..
Joldaý erek bolǵandyqtan jyldaǵy,
Qoldaý kerek sony jazǵan aǵaǵa!
Ókinishsiz, uzaq ómir súrýge
Narqyn nyqtap, halqyn tarta bilýde.
Baby bekem bul tolaǵaı tulǵanyń
Jer júzinde teńdesi joq búginde!
Jaýap berip talaptarǵa sapalyq,
Zaý bıikte «Máńgilik el» atanyp,
Biz Ortalyq Azıada derjava
Bolyp qalar mejemizge taqadyq!
Tynysynyń tylsymyn tek taý uǵar,
Aınalaıyn, Alty Alashtyń baǵy bar!
Myń ǵasyrǵa tatıtuǵyn ǵalamat –
«Nazarbaev dáýiri» dep tanylar!..
Nazaryna ilikkende jyr aman,
Shyn marqaıyp qalar, sirá, Nuraǵam?!.
Óleńshiler sanatynan emespin,
Jattalmaıtyn jyltyr sózdi quraǵan!
VI
SHAH-SHAHARYM ásemdikten shep túzdi,
Eski óńge jańa boıaý jetkizdi...
Ókpe tustan ótip ketken joq shyǵar,
Eskerer sát «alǵashqy lek» dep bizdi?!.
Osy jerden jıǵandyqtan mol ilim,
Eshbir pende deı almaıdy ony min.
Kóp bálsinip keshe kelgen keı sabaz,
Bás tússe de, baıaǵydaı KÓŃİLİM!
Erlik jaıly aqyl aıtty ez inim,
Bir shıshalyq «dostardan» da mezimin!
Solar bar dep,
Keń qushaqty mekenge
sýymaıdy eń alǵashqy SEZİMİM!
Qaıtpaı qoıǵan, qatqanymen sile myń,
Yqpaldardan yrqym ada – bilerim.
Gúl órnekti alańdardyń arqasy,
Shaılyqpasa júgi batpan JÚREGİM!
Júz elitip, jelpinter ár adamyn,
Qalanyń bir quty bolǵaı qalamym!..
Dańǵyldary jańǵyryǵyp dańqynan,
Qartaıǵansha qaryshtaıdy QADAMYM!
Tilmen sheshsem talabymnyń túıinin,
Igiligim ıliktirer ıinin...
Tursyn ázir silemin de sezdirmeı,
Saryarqada saqtalatyn BIİGİM!
Kókjıekten kúndi kórsem men búgin –
Jappaǵany jarqyraǵan eldi muń.
Taýsyz dala –
Ormandarǵa oranyp,
tynysyma tynys qosqan KEŃDİGİM!
Shashý etsem Shah-shahardyń deregin,
Úshtoǵyzdy aıamaǵan er edim.
«El ordasy» degen tanym – tup-tunyq,
Tartylmaıtyn, sarqylmaıtyn TEREŃİM!
Bir árpindeı jarıaly Jarǵynyń,
Jalpy, munda esh qatesiz bar qunym!
Jańa qala qabyrǵasyn órgende,
«Astanalyq» dep qalanǵan TAǴDYRYM!
***
Jutqandyqtan aýasynan, sýynan,
Tamyrymda týlaı tústi uly qan.
Oı tozańyn shaıyp aspan jasymen,
Samalynyń sybyrynan syr uǵam.
Turaqtasań jan-tánińdi umsynyp,
Tura bermes qysy da qur qyrsyǵyp.
Bir ret qabaq shytqan emes ózime,
Ózgelerge kóringenmen tym sýyq!
VII
Osy jaqta basymyzǵa baq daryp,
Qıyndyqqa qıal sarqyp jatpadyq...
Balalarym qalalaryn dáripter,
«Kindik qanym tamǵan jer» dep maqtanyp!
Bolǵanymen ózi eldiń júregi,
Bizdiń júrek qaǵysynda júredi.
Tań atysyn, kún batysyn osynda
Ótkergenge shúkir etem únemi.
Jyrym osy, has aqynǵa tán, mine!
Arnaý kerek bir shynaıy ándi de!..
Jylda munyń týǵan kúnin áspetter
Mándi mátin jazyp ketem máńgige:
Astana kúni, Astana kúni – shattyǵym!
Baq gúlin ekken sátti kún eken naq búgin.
Ulyqtar tynbaı ǵuryptan yńǵaı aınymas,
Umytar mundaı, umytar mundaı shaqty kim?!
Astana kúni, Astana kúni – merekem!
Sen eken aq tań. Berekem artqan el ekem.
Týǵan kúnińmen, týǵan kúnińmen, bas qala!..
Dýmandy únmen jyrlardy birden sel etem.
Astana kúni, Astana kúni... Ne deıin?..
Ne deıin saǵan?!. Teńeıin ǵalam mereıin!
Ashqan árińdi asqan sánińdi pash etip,
Asqaq ánimdi, asqaq ánimdi tógeıin.
Jigeri myqty, tilegi qutty aǵaıyn!
Ońy men soly yrysqa toly mańaıym!
Aspany nurly, asqarly, nýly baıtaǵym!
Bárińe de jar, bárińe de jar salaıyn!!!
Pikir qaldyrý