Memlekettik hatshy Gúlshara Ábdiqalyqova Bosnıa jáne Gersegovınanyń Qazaqstandaǵy Tótenshe jáne ókiletti elshisi qyzmetin qosa atqarýshy Mýstafa Mýezınovıchten, El-Salvador Respýblıkasynyń Qazaqstandaǵy Tótenshe jáne ókiletti elshisi qyzmetin qosa atqarýshy Efren Arnoldo Bernal Chevezden, Nıgerıa Respýblıkasynyń Qazaqstandaǵy Tótenshe jáne ókiletti elshisi qyzmetin qosa atqarýshy Ibrahım Hamzattan senim gramotalaryn qabyldady.

Gúlshara Ábdiqalyqova Bosnıa jáne Gersegovınanyń elshisimen kezdesýde IýNESKO-nyń materıaldyq emes mádenı murasy komıtetiniń bıylǵy 4-6 maýsymda Parıjde ótken saılaýynda bizdiń elge qoldaý kórsetkeni úshin alǵys bildirdi. Qazaqstan atalǵan Komıtetke alǵash ret saılanyp otyr jáne búkil jer sharyndaǵy mádenı muralardy saqtaý isiniń teorıasy men tájirıbesin jetildirýge óz úlesin qosýǵa nıetti.  

– Tikeleı iskerlik baılanysty damytý mańyzdy. Eki eldiń saýda-ónerkásip palatalary arasynda yntymaqtastyq ornatyp, isker toptar ókilderiniń kezdesýlerin ótkizýdi usynamyz, – dedi Gúlshara Ábdiqalyqova.

El-Salvador elshisimen áńgimelesý barysynda Memlekettik hatshy Qazaqstan ekijaqty yntymaqtastyqty damytýǵa múddeli ekenin atap ótti.

– Sizdiń eldi búgingi kúni EKSPO kórmesiniń platformasynda BUU jáne İT-startaptar halyqaralyq tehnoparkiniń qoldaýymen «Jasyl» tehnologıalar men ınvestısıalyq jobalardy damytý jónindegi halyqaralyq ortalyǵynda,  Astana halyqaralyq qarjy ortalyǵynda júzege asyrylyp jatqan jobalar boıynsha yntymaqtastyqqa shaqyramyz, – dedi G.Ábdiqalyqova.  

Nıgerıa elshisimen kezdesý kezinde Memlekettik hatshy Qazaqstan Qaýipsizdik Keńesiniń 2017-2018 jyldardaǵy turaqty emes múshesi ekenine, basqalarmen birge Somalı men Erıtreıa boıynsha da birqatar sanksıalyq komıtetterdi basqarǵanyna nazar aýdardy.

– Biz Nıgerıany Islam Yntymaqtastyǵy Uıymynyń, Afrıka Odaǵynyń, basqa da kóp jaqty qurylymdardyń óńirlik jáne halyqaralyq aýqymda syndarly orny bar mańyzdy múshesi retinde bilemiz, – dedi Gúlshara Ábdiqalyqova.