Almatyda QR Memlekettik rámizderi kúni toılanyp jatyr. Almaty ákimi Baýyrjan Baıbek Qazaqstannnyń memlekettik rámizderi Otanymyzdyń tarıhy men dástúrin jáne halqymyzdyń qaıtalanbas ereksheligi men ulylyǵyn pash etetinin atap ótti.

«Táýelsizdiktiń alǵashqy kúninen bastap  Prezıdenttiń barlyq baǵdarlamalary men reformalary qarapaıym  qazaqstandyqtarǵa, eń aldymen jastarǵa baǵyttaldy. Bıylǵy jyly jarıalanǵan Elbasynyń Bes áleýmettik bastamasy jas otbasylardyń turǵyn úı jaǵdaıyn jaqsartýǵa, stýdenttik jataqhanalar máselesin sheshýge, sapaly joǵary bilim alýǵa keń múmkindik beredi. Osynaý bazalyq basty negizder árbir jas adamnyń óz áleýetin júzege asyrýǵa, tabysqa jetýine jol ashady», - dedi qala basshysy.

Aıta ketý kerek, bıyl qalada jastarǵa arnalǵan qalalyq «Almaty jastary» turǵyn úı baǵdarlamasy odan ári jalǵasatyn bolady. Baspanalar jas otbasylarǵa alǵashqy jarnasyz 5% nesıemen beriledi.  Ol úshin jergilikti búdjetten 2 mlrd teńge bólindi. 3 myńǵa jýyq balany mektepke deıingi bilimmen qamtý úshin jeke balabaqshalarǵa memlekettik tapsyrys ulǵaıdy. Oǵan 850 mln teńge bólindi. Qart adamdardy belsendi ómirge tartý úshin aǵa urpaqqa  arnalǵan «Belsendi uzaq ómir» arnaıy baǵdarlamasy jasaldy.

Memlekettik rámizder kúni qurmetine «Halyq Arena» muz kesheniniń sahnasynda áskerı orkestrler ujymdary men qazaq estradasy juldyzdary, sonyń ishinde Roza Rymbaeva, Altynaı Jorabaeva, Álı Oqapov jáne basqalary óner kórsetti.

Sonymen qatar, búgin  Panfılov kóshesi boıymen Abaı atyndaǵy opera jáne balet teatrynan Jibek joly kóshesine deıin orkestrlerdiń merekelik sherýi  ótetini josparlanǵan.