"Álem qazir túbegeıli ózgerister zamynynda. Sıfrlandyrý - ulttyq ekonomıkanyń qozǵaýshy kúshi. Álemdik uıymdar osy sıfrlandyrýǵa mán berip otyr. EAEO da 2025 jylǵa deıin sıfrlandyrýǵa mán berip otyr.", - degen bolatyn Prezıden Nazarbaev.
«Sıfrly Qazaqstan» baǵdarlamasy mindetteriniń biri – sıfrly ındýstrıa qurý, ıaǵnı uzaq merzimdi turaqtylyqty qamtamasyz etý. Qazaqstandyq IT ındýstrıa EAEO keńistigine qanat jaıa bastady. 21-22 maýsym aralyǵynda qazaqstandyq delegasıanyń Bishkek qalasynda jumys sapary ótti. Kezdesýde «Sıfrlyq Qazaqstan» memlekettik baǵdarlamasy jáne Qyrǵyz Respýblıkasynyń «TazaKoom» Ulttyq sıfrlyq transformasıalaý baǵdarlamasy aıasynda yntymaqtastyq máseleleri talqylandy.
Sıfrly tehnologıa – ekonomıkalyq serpilistiń tıimdi tetigi ekeni anyq. Qazaqstannyń 29 kompanıasy qyrǵyz ókilderine 80-nen astam aqparattyq-tehnologıalyq sheshimderi men ónimderin usyndy. Qazaqstandyq kompanıalardyń densaýlyq saqtaý, bilim berý, aqparattyq tehnologıalar, telekomýnıkasıalar, Smart City, kólik, qaýipsizdik, ekonomıka jáne qarjy salasyndaǵy múmkindikteri Qyrǵyzstandaǵy memlekettik organdar men iri kompanıalardyń qyzyǵýshylyǵyn týdyrdy.
Qazaqstandyq IT-kompanıalar men «Qyrǵyztelekom» AAQ, «Qyrǵyz pochta» MK aralarynda eki memorandýmǵa qol qoıyldy.
Sondaı-aq kezdesý barysynda QR Aqparat jáne komýnıkasıalar vıse-mınıstri Dınara Sheglova Astana Hub Halyqaralyq Tehnoparkiniń tanystyrylymyn ótkizdi.
Qorytyndy keńeske Qazaqstan Respýblıkasy Premer-Mınıstriniń orynbasary Asqar Jumaǵalıev jáne Qyrǵyz Respýblıkasynyń Premer-Mınıstriniń orynbasary Zamırbek Asqarov qatysty.
Asqar Jumaǵalıev «Sıfrlyq Qazaqstan» Memlekettik baǵdarlamasy jaıly qyrǵyz taraptaryna aıtyp berdi jáne 2018 jyldyń 3 shildesine josparlanǵan Astana Hub pavılonynyń tehnıkalyq ashylýyna shaqyrdy.
Óz kezeginde, Zamırbek Askarov Qazaqstanmen yntymaqtastyqtyń strategıalyq mańyzdylyǵyn jáne aqparattyq tehnologıalar salasyndaǵy úlken áleýetti atap ótti. Aqparattyq tehnologıalar jáne baılanys jónindegi Qyrǵyzstan Respýblıkasy memlekettik komıtetiniń tóraǵasy Baqyt Shárshimbıev qazaqstandyq delegasıanyń jasaǵan saparyna alǵysyn bildirdi jáne qazaqstandyq kompanıalardyń usynǵan sheshimderi qyrǵyz elinde suranysqa ıe ekenin atap ótti.
Sapar barysynda Qazaqstan Respýblıkasy Aqparat jáne baılanys mınıstrligi men Qyrǵyz Respýblıkasy aqparattyq tehnologıalarynyń memlekettik komıteti arasynda tájirıbe almasý maqsatynda is-sharalar ótkizildi. Taraptar eki eldiń úlken derekter, bulttyq tehnologıalar, elektrondyq qujat aınalymy salasyndaǵy tájirıbesin talqylady jáne memorandýmdar men kelisimderdi ázirleý týraly ýaǵdalasty.
Sapar sońynda Asqar Jumaǵalıev IT-kompanıalardyń ókilderimen birge kezdesýlerdiń qorytyndysyn talqylady. Kompanıa ókilderi is-sharanyń tıimdiligin atap ótti jáne osyndaı saparmen basqa elderge baryp, óz múmkindikterin usynýǵa daıyn ekendigin aıtty.
Qazaqstan TMD ishinde alǵashqy bolyp, elektrondyq sıfrlyq qoltańbany qoldanýdy, elektrondyq úkimet biryńǵaı portalynda elektrondyq memlekettik qyzmetterdi engizýdi bastaǵan. «Sıfrlyq Qazaqstan» ekonomıkasyn jedel tehnologıalyq jańǵyrtýdy qamtamasyz etý baǵytynda sıfrlyq transformasıalaý boıynsha keshendi baǵdarlama qabyldandy. Baǵdarlamada 2 negizgi maqsat aıqyndalǵan. Birinshi, ekonomıka salalaryn sıfrlandyrý, sıfrlyq memleketke ótý jáne «Sıfrlyq Jibek jolyn» damytý arqyly ekonomıkany damytý jáne halyqtyń turmys sapasyn jaqsartý qarqynyn aıtarlyqtaı údetý. Ekinshi, adam kapıtalyn damytý jáne uzaq merzimdi perspektıvada ınovasıalyq ekojúıeni qurý arqyly Qazaqstan ekonomıkasynyń jańa damý traektorıasyna ótý mindeti tur.
