Ótken aptada Qaraqalpaqstan astanasy Nókiste Aqtóbe oblysynyń kúni ótti. Sapar aıasynda Aqtóbe oblysynyń ákimi Berdibek Saparbaev pen Qazaqstannyń Ózbekstandaǵy Tótenshe jáne ókiletti elshisi Erik Ótembaev bastaǵan delegasıa osyndaǵy Sorsha qorymynda jerlengen qazaqtyń uly aqyny Tólegen Aıbergenovtiń basyna zıarat etti.
Jalpy Tólegen Aıbergenovtiń kindik qany tamǵan jer — Qaraqalpaqstannyń Qońyrat aýdany, «Tań nury» aýyly. Ákesi men eki sheshesi, «Apalarym» atty óleńinde aıtylatyn úsh baýyry aýyl irgesindegi «Dastan ahýn» qorymynda jerlengen. 1967 jyly Almatyndan týǵan jerine issaparmen barǵan kezde kenetten aýyryp, dúnıeden ozǵan aqyndy áke-sheshesiniń qasyna qoıý týraly áńgime bolǵan. Biraq ony Qazaqstannan izdep keletinder áýrege túspesin degen nıetpen Nókistegi áýejaı mańyndaǵy Sorsha qorymyna jerleý uıǵarylypty.
Árıne, Qaraqalpaq jerine joly túsken adamnyń Tólegen Aıbergenovtiń basyna soqpaı ketetini sırek. Degenmen bir kezde eki el arasyndaǵy qarym-qatynastyń oıdaǵydaı bolmaýy sebepti bunda Qazaqstannan arnaıy keletinderdiń azaıǵany da ras. Ózbek eliniń tizginin ustaǵan Shavkat Mırzıóevtiń Elbasy Nursultan Nazarbaevty aǵa tutyp, bizdiń elge keń qushaǵyn ashqandyǵynyń arqasynda keıingi kezde baýyrlas halyqtardyń arasynda barys-kelis, alys-beris kúsheıe tústi. Bıyl Qazaqstandaǵy Ózbekstan jyly bolyp jarıalandy. Sonyń arqasynda qaraqalpaq jerine jol túsip otyr.
Sapardy aldyn ala pysyqtaǵan jıynda Berdibek Mashbekuly aqtóbelik delegasıanyń mindetti túrde Tólegen Aıbergenovtiń basyna barý kerektigi týraly aıtqan bolatyn. Sony estigen qaraqalpaq baýyrlar da tyńǵylyqty ázirlenipti. Aqynnyń beıitine barar soqpaqqa tas tóselgen. Beıittiń jan-jaǵyna oryndyqtar qoıylǵan. Quran oqylyp, gúl shoqtary qoıyldy. «Biz Aıbergenovti umytpaýymyz kerek!», — dedi Berdibek Mashbekuly aıat oqyp bolǵannan keıin, — onyń rýhyna taǵzym etý — mindetimiz». «Búgin beısenbi ǵoı, — dedi sosyn moldaǵa burylyp, — erteń juma kúni taǵy kelip, bizdiń atymyzdan Quran shyǵarshy». Sóıtti de jón-joralǵysyn jasady.
Qazaqstannyń Ózbekstandaǵy Tótenshe jáne ókiletti elshisi Erik Ótembaev ózbek bıligimen kelise otyryp, ózbek jerindegi qazaq ultyna qatysty qasıetti oryndardyń tizimi jasalyp jatqandyǵyn aıtty. Aıbergenov beıiti solardyń qataryna kirmek.
Aıta ketý kerek, Berdibek Saparbaev pen Erik Ótembaev — elimiz Táýelsizdik alǵaly aqynnyń basyna zıarat etken alǵashqy laýazymdy tulǵalar. Ózge sheneýnikter de úlgi alady dep senemiz.
Baýyrjan BABAJANULY
