Maqtaral aýdanynda salyq túsimderi qadaǵalaýǵa alynyp, «Sıfrly Qazaqstan» baǵdarlamasynyń júzege asyrý maqsatynda negizgi 4 baǵytqa basymdyq beriletin bolady. Sonymen qatar, maqta daqylyn zıankesterden qorǵaý, tazartý maqsatynda keshendi is-sharalar júzege asyrylmaq. Budan bólek, aýdan kóleminde óndirilip, shetel men Soltústik oblystarǵa jóneltilip jatqan baqsha ónimderi esepke alynbaq. Búgin bul týraly apparattyń keńeıtilgen otyrysynda Maqtaral aýdanynyń ákimi Jamantaı Beısenbaev málim etti.
Kún tártibindegi birinshi másele – aýdan búdjetiniń ıgerilýi men ındıkatorlardyń merzimdi oryndalý barysy boldy. Bul týraly aýan ákiminiń orynbasary B.Tórebekov baıandama jasady. Onyń aıtýynsha, 2016-2020 jyldarǵa arnalǵan «Damý» baǵdarlamasynda 35 nysanaly ındıkator jáne 73 tikeleı nátıje boıynsha kórsetkishter jaman emes. Alaıda, 2018 jyldyń 5 aıynda 4 ındıkator jáne 2 túpkilikti nátıje kórsetkishinde kórsetkishter tómen bolyp otyrǵandyǵyn jetkizdi. Ol úshin aýdandyq derbes bólim men aýyldyq okrýg ákimdikteriniń esepshileri aýdandyq ekonomıka qarjy bóliminiń mamandarymen birlese otyryp jumys istep, oryn alyp otyrǵan kedergilerdi tezdetip sheshý kerek. Máselege qanyqqan aýdan basshysy tıisti bólim basshylaryna naqty tapsyrmalar júktedi.
«Joǵaryda atalǵan ındıkatorlar men tikeleı nátıje kórsetkishiniń aldaǵy 6 aıdyń qorytyndysy shyqqanǵa deıin oryndalýy tıis. Osy rette qala, kent, aýyldyq okrýg ákimderi búdjettiń ıgerilýi men ındıkatorlardyń oryndalýyn qamtamasyz etýi kerek. Ol úshin az ǵana ýaqyt beriledi. Sondyqtan barshańyzdy qarjy ıgerýde barynsha muqıat ári zań aıasynda jumys isteýge shaqyramyn» , - dedi Jamantaı Qanaıuly.
Jıyn barysynda ıgilirmeı qalý qaýpi bar delingen qarjylardyń sebep-saldary talqylanyp, tıisti sala basshylarynyń ýájderi tyńdaldy. Atap aıtqanda, óńdeý ónerkásibiniń kólemi, óńdeý ónerkásibi óniminiń naqty kólem ındeksi, halyqtyń týǵan kezdegi kútiletin ómir súrý uzaqtyǵy jáne kóshelerde jasalǵan qylmystardyń úles salmaǵy jónindegi ındıkatorlarǵa negizgi basymdyq berildi.
Jıyndy qorytqan aýdan ákimi óńirdegi tazalyq máselesin de udaıy baqylaýda ustaýdy eskertip, tapsyrmalardyń ýaqytyly ári oryndalýyn qadaǵalaýdy tapsyrdy.
