Darıǵa Nazarbaevanyń qyzy Venera Álıeva Shaıjúnisovter áýletiniń urpaǵy, 22 jastaǵy Dálenge turmysqa shyqty. Almatydaǵy Ritz Carlton qonaqúıiniń saltanat zalynda dúrkirep ótken toıda otandyq ónerpazdarmen birge Reseı ánshileri de qonaq boldy. Elbasymen quda bolǵan bul qaı Shaıjúnisovter? Qamshy.kz aqparat agenttigi ashyq derekkózden jınalǵan málimetti usynady.
1914 jyly Semeı óńirinde dúnıege kelip, 1983 jyly qaıtys bolǵan Jaqıa Shaıjúnisov – Qazaqstannyń eńbek sińirgen muǵalimi, ustaz. Áleýmettik Eńbek Eri, Lenın, «Qurmet belgisi» ordenderimen marapattalǵan. SHQO Kókpekti aýdanynda Jaqıa Shaıjúsinov atyndaǵy mektep bar. Bıyl Óskemen belsendileri: «Qaladaǵy Voroshılov kóshesine Jaqıa Shaıjúnisovtiń esimi berilsin», - degen bastama kóterdi.
Al onyń uly 1939 jyly týǵan Marken Shaıjúnisov 1998 jyldyń qazany men 2000 jyldyń naýryzy aralyǵynda Semeı qalasyn basqardy. Syrtqy ister mınıstrliginde jaýapty hatshy qyzmetin atqaratyn Ermek Kósherbaev pen Pavlodar qalasyndaǵy Halyq Banktiń fılıalyn basqaratyn Bolat Ramazanov – Marken Shaıjúnisovtiń kúıeý balalary.
Jaqıa Shaıjúnisovtiń taǵy bir uly Toqan Shaıjúnisov «Kazgıprosvetmet» JSHS-niń prezıdenti, Qazaqstan Respýblıkasynyń Eńbegi sińgen qurylysshysy. Kóptegen jyl boıy K.Raev atyndaǵy balalar úıi men J.Shaıjúnisov atyndaǵy orta mektepke materıaldyq kómek kórsetip keledi. Óskemen qalasynyń, Kókpekti aýdanynyń «Qurmetti azamaty». «Qurmet» ordenimen, el prezıdenti N.Á.Nazarbaevtyń alǵysqatymen, «Eńbek úzdigi úshin» medalimen marapattaldy, al qaıyrymdylyq qyzmeti úshin úsh márte «Jyl adamy» ataǵyna ıe boldy. Ashyq derekkózderge súıensek, osy ýaqytqa deıin Toqan Jaqıauly mektepke 1500000 teńgeniń kóleminde qarjylaı kómek kórsetken. Jyl saıyn mektepti sporttyq jabdyqtarmen qamtamasyz etip demeýshilik jasap otyrady.
Toqan Shaıjúnisovtiń uly 1971 jylǵy Sergeı Shaıjúnisov – «KazTrýbprom» AQ jáne «KazPetroMashKommers» JSHS-nyń bas dırektory.
Jelide taraǵan derekterge sensek, Darıǵa Nazarbaevanyń kúıeý balasy Dalen – Sergeı Shaıjúnisovtiń uly. Dalen ál-Farabı atyndaǵy Qazaq ulttyń ýnıversıtetiniń zań fakúltetin támamdaǵan.
Qazaqstandyqtarǵa belgili Jaqıa Shaıjúnisovtiń taǵy bir balasy 1957 jylǵy Serjan Jaqıauly «Qazaqkabel» JSHS-nyń bas dırektory boldy. Sonymen qatar Shyǵys Qazaqstandaǵy Qorshaǵan ortany qorǵaý basqarmasyn basqarǵan.
Al Serjan Jaqıaulynyń uly Álen Shaıjúnisov – velosport federasıasynyń vıse-prezıdenti, QR Sport jáne dene shynyqtyrý agenttigi tóraǵasynyń orynbasary, «Astana EKSPO-2017» UK basqarma tóraǵasynyń orynbasary.
