Almaty ákimi Baýyrjan Baıbek qalanyń komýnaldyq meshigine qaıtarylǵan Baým baǵyn abattandyrý jumystarynyń barysymen tanysty. Tabıǵı eskertkishtiń aýmaǵy 139,5 ga, munda 100 myńnan astam jasyl jelek bar. Bul jaıynda Almaty qalasy ákimdiginiń saıtynda habarlandy. 

Park aýmaǵynyń perımetri boıynsha qoǵamdyq qaýipsizdikti qamtamasyz etý úshin táýlik boıyna jumys isteıtin tórt polısıa núktesi qoıylǵan. Polısıa núkteleri qala máslıhatynyń depýtaty Qaırat Qudaıbergenniń jeke qarjysy esebinen jumys isteýde. Baq aınalasyn jas patrúlshilderdiń baqylaýy qarastyrylýda. Eko stıldegi navıgasıalyq taqtashalar ilinip, buryn jyǵylǵan aǵashtardan jasalǵan 20 oyrndyq qoıylǵan.

Júrgizilgen monıtorıń kezinde baqtyń 2,5 ga jerin jeke adamdardyń jáne kólik turaǵyn jasaý úshin avtosalon ıeleriniń óz betterimen basyp alǵandary anyqtaldy. Megapolıs basshys zańǵa sáıkes baqtyń basyp alynǵan jerlerin qaıtarýdy jáne jasyldandyrýdy tapsyrdy.

«Qalalyqtardyń demalýy úshin kapıtal shyǵynysyz jáne ekologıaǵa barynsha az áser etip, jaıly jaǵdaı jasaý qajet. Ǵalymdardy tarta otyryp, jasyl jelekti qorǵaý jáne ulǵaıtý qajet, topyraqtyń jáne klımattyń ereksheligi eskerilip, aǵashtar sapaly kútilýi tıis. Aleıany jaryqtandyrý úshin jańarǵan energıa kózderin paıdalanǵan jón, óıtkeni tabıǵı aımaq erekshe qorǵalady jáne munda ınjenerlik jelilerdi júrgizýge bolmaıdy», - dep atap ótti Baýyrjan Baıbek.

Baým baǵynda qaıyń alaeıasyn jasaý, terek, tal aǵashtaryn otyrǵyzý josparlanǵan. Shilde aıynda aǵashtardyń ımýnıtetin jaqsartatyn jáne ony zıankesterden qorǵaıtyn zamanaýı preparattar satyp alynyp, bıologıalyq óńdeý jumystary atqarylady. Tabıǵı aımaqta flora men faýnany keńeıtý mindeti qoıylǵan.

Bulardan ózge, baq aınalasy sanıtarlyq tazalyqtan ótýde. Tek sońǵy senbilik kezinde osy jerden 43 samosval qoqys shyǵaryldy. Baq aýmaǵynda ıtti serýendetetin alań men balalardyń aǵash qalashyǵy paıda bolady. Baqtyń syrtqy jaǵyn jaryqtandyrý júıesi jańarady, Úlken Almaty kanaly aýmaǵynda balalar alańy jasalady.

Aıta keterligi, Almatyda bıylǵy jazda 157 kóshe jóndeledi, 600 aýla kóriktendiriledi. Barlyq jer asty ótpeli joldar kúrdeli jóndeledi, jańa fontandar salynady. Buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańynan ózge megapolıstiń birqatar negizgi dańǵyldary túgeldeı jańarady.