Oral qalasynda 29 aýlany abattandyrylyp, 50 kóshe kúrdeli jáne ortasha jóndeýden ótýde.

Jańadan salynǵan shaǵynaýdandardy esepke almaǵanda Oral qalasynda 389 aýla bar. 2007-2017 jyldar aralyǵynda 300-deı aýla aýmaǵy abattandyrylǵan. Endi 60 aýla qalyp otyr. Oral qalasynyń ákimi Murat Muqaevtyń aıtýynsha, jyl saıyn 30 aýla abattandyrylsa, eki jylda aýlalardy abattandyrý tolyq aıaqtalady. Bıylǵy jyly 23 aýla boıynsha JSQ daıyndalmaq. Ol úshin qarjy bólingen. Jańa nysandardyń berilýine baılanysty bıyl gúlderdi otyrǵyzý kólemi artty. Máselen, ótken jyly 21 myń sharshy metr alańǵa gúl egilse, bıyl jalpy aýmaǵy 30 myń sharshy metr bolatyn jer gúlmen kómkerilgen. «Kóbelek», «Júrek», «Saǵat», «Juldyz» syndy konstrýksıalar da qalamyzǵa erekshe sán berip tur.

– Aldaǵy ýaqytta qalanyń jeti aýdanynda doǵa túrindegi qurastyrmalar daıyndalyp, qumyradaǵy gúlder qoıylady. Sondaı-aq kásipkerler esebinen №36 orta mektep janyndaǵy jáne T.Masın kóshesindegi tynymbaqtar abattandyrylady, – dedi Oral qalasynyń ákimi Murat Rahmetuly.

 Al joldarǵa kúrdeli jóndeý jumystary ortalyq jáne qoǵamdyq kólikter júretin jáne qozǵalysy kóp joldardan  bastaldy. Qazirgi ýaqytta 23 nysan boıynsha qurylys-montaj jumystaryn júrgizý úshin merdiger kompanıalarmen kelisimshart jasalǵan. Onyń 11-i ótken jyldan bastalyp, bıyl jalǵastyrylyp jatqan jol qurylystary. Al bıyl 12 kóshe jańartylady. Onyń altaýy – QPO b.v tarapynan, altaýy – jergilikti búdjetten qarjylandyrylmaq.

            Sondaı-aq bıyl Oral qalasy avtomobıl joldaryn aǵymdaǵy jóndeýden ótkizý úshin 300 mln. teńge bólingen. Oǵan 69 kóshe boıynsha shuńqyrlarlary jamalyp, 8 kóshege trotýar, qatty jabyny joq 25 kóshege usaqtalǵan qıyrshyqtas tóselmek.  

Aıta keteıik, Oral qalasy boıynsha joldardyń jalpy uzyndyǵy 615,5 shaqyrym. Onyń jartysy, ıaǵnı 299,23 shaqyrymy asfáltbetonmen jabylǵan. 315,92 shaqyrymy – qara jol.