Oral qalasynda memlekettik tapsyrysty oryndaıtyn 44 jeke balabaqsha bar. Al balany memlekettik balabaqsha kezegine qoıý, joldama berý tolyǵymen avtomattandyrylǵany belgili. Bul baǵytta arnaıy portal qyzmet etedi. Osy oraıda Oral qalalyq bilim berý bóliminiń basshysy Jansulý Tóremuratova men QR Bilim jáne ǵylym mınıstrligi janyndaǵy jumys tobynyń múshesi Evgenıı Sherbanovtan atalmysh júıeniń artyqshylyǵyn bilgen edik.
Oral qalalyq bilim berý bóliminiń basshysy Jansulý Meńeshqyzynyń aıtýynsha, bilim berý salasyndaǵy sıfrlandyrý sybaılas jemqorlyqtyń aldyn alý baǵytynda qurylǵan. Bir jaǵynan ata-analarǵa da yńǵaıly. Olar quzyrly organdarǵa barmaı-aq, úıde, jumysta otyryp balabaqsha kezegin baqylaı alady. Al baǵdarlamany qurastyrýshy Evgenıı Sherbanovtyń sózinshe, balalardy balabaqsha kezegine qoıý jáne balabaqshalarǵa qabyldaý erejesi 2017 jyly ózgergen.
- Bul barlyq elde sybaılastyqqa jol bermeý maqsatynda jasalǵan baǵdarlama. Elektrondy júıe kezegine bilim berý bólimi, bóbekjaı basshylary aralasa almaıdy. Kezekke ár ata-ana bala dúnıege kelgen jyly tirkeledi. Sebebi búldirshinder balabaqshada jas ereksheligine qaraı bólinedi. Máselen, «bóbekjaıdan 100 balaǵa oryn bosady, meniń balam nege qabyldanbady» degender qaı jylǵy balalardyń bul oryndy bosatqanyn qaraýy kerek,- deıdi ol.
Bóbekjaıdan oryn bólý jyl boıy úzdiksiz júrgiziledi. Ásirese, balalardyń birazy balabaqshadan mektepke ketetin jaz aıynda oryn kóp bosaıdy. Aqparattyq júıege ótinish berý elektrondy Úkimet portaly arqyly, HQKO jáne bilim berý keńsesi arqyly júrgiziledi. Barlyq ótinishterdi robot tekseredi. Jeńildikter eki sanat boıynsha jasalady eken. Kezekten tys áskerı jáne arnaıy organ qyzmetkerleriniń balalary qabyldansa, birinshi kezekte erekshe sanattaǵy balǵyndar men múmkindigi shekteýli ata-ananyń, kópbalaly otbasynyń balalary men qamqorlyqtaǵy balǵyndar tur. Máselen, Zashaǵandaǵy «Zańǵar» balabaqshasyn mysalǵa alsaq, bul aýdanda áskerı qyzmetshiler men memlekettik qyzmetkerler kóp turatyndyqtan, munda balany balabaqsha kezegine turǵyzý ońaı emes. Óz kezeginde Jansulý Meńeshqyzy jeke balabaqshalar da memlekettik tapsyrysty oryndaıtyndyqtan, onda tólemaqy 12 myń teńgeden aspaıtynyn eskertti.
