Ótken jeksenbide jol apatynan qaza tapqan Eskendir Súleımenovtiń jaqyn qurbysy qyrshynynan qıylǵan jas jigittiń ómiri jaıynda sputnik.kz saıtyna suhbat berdi, dep habarlaıdy Qamshy.kz aqparat agenttigi

Malıkanyń aıtýynsha, qyrkúıek aıynda Súleımenovter otbasynda eki qýanysh bolýy tıis edi. Eskendir 27 jasqa tolǵan týǵan kúni men úılený toıyn atap ótýdi josparlap júrgen.

Eskendirdiń otbasynda úsh bala bar. Ózinen bir jas úlken ápkesi, Eskendir jáne qaryndasy. Eskendir jalǵyz nemere bolǵandyqtan, Oljas Omaruly Súleımenovterdiń izin jalǵastyrsyn dep óz famılıasyn bergen. Eskendir Italıada mektep bitirgen, eki joǵary bilimi bolǵan. Tórt tildi jetik meńgeripti: fransýz, aǵylshyn, ıtalán jáne orys tili. Elordalyq kompanıalardyń birinde aktıvter departamentiniń mamany qyzmetin atqarǵan.

"Ózim biletin eń keremet jandardyń biri edi. Barlyq jaǵynan jaqsy adam, ishpeıtin, shekpeıtin, sportqa qumar edi. Meıirimdi ári salmaqty bolatyn. Úısiz janýarlardy qamqorlyǵyna alyp, járdemdesetin", – deıdi marqumnyń jaqyn qurbysy Sputnik tilshisimen suhbat barysynda.

Eskendir motosıkl týraly baıaǵydan armandaǵan, biraq rólge otyrǵanyna kóp bolmapty. Motosıkldi uzaq aıdamaǵannan keıin jolda erekshe muqıat bolyp, jyldamdyqty asyrmaıtyn, dep eske alady Malıka.

"Júrgizýshilik sheberligin arttyrý úshin Astanadaǵy baıkerler klýbyna qosyldy. Taǵdyrdyń jazýy shyǵar, klýbtaǵy jigitter sýyt habardy birinshi estip, taratty", — deıdi suhbat berýshi.

Qazir Eskendirdiń anasy Eýropada turady, al ákesi – Almatyda, qaıǵyly oqıǵa kezinde saparda júrgen.

Apatqa ushyrar aldynda bir kún buryn Eskendir dostarymen birge "Astana Opera" teatrynda opera tyńdap qaıtypty. Juma kúni keshkisin dosyna bara jatqanda, jantúrshigerlik jol apaty bolǵan.

"Baqylaý kameralaryndaǵy vıdeony kórmedik, eń jaqyn týystaryna, tátesine ǵana kórsetti. Habardy estigen boıda, oqıǵa ornyna jınaldyq. Qanǵa boıalǵan denesin kórdim, 12 metrge ushyp ketipti. Dárigerlerdiń aıtýynsha, birden kóz jumǵan.  Moıyny úzilip ketip, basy jarylǵan", – dep Malıka eske alady.

Polısıa bergen málimetke súıensek, jol apatynda kisi qaza tapqanda, qatysýshylardy birden alyp ketedi. Bul joly da solaı bolypty. Eskendirdiń jaqyndary kelgenshe, kóliktiń rólinde bolǵan qyz oqıǵa ornynan tabylmaǵan. Dostary kólik pen júrgizýshiniń nómirin sýretke túsirip úlgeripti.

"Osy ýaqytqa deıin álgi qyz kelip, apattyń qalaı bolǵanyn aıtyp bergen joq. Otbasy eshkimdi kinálamaıdy, tek ózi kelip, bolǵan jaıtty túsindirgenin qalaımyz. Shýdy kótergen bizbiz, ınternettiń kúshin paıdalandyq. Oqıǵa ornynda túsirilgen vıdeony kórsetetin shyǵar dep úmittenemiz, oǵan eshteńe bolmaıdy. Aty men famılıasyn jarıalaýǵa tyıym saldy, biraq ol qyzdyń qarapaıym emes ekenin aıta alamyn. Másele Eskendir Oljas Súleımenovtiń nemeresi bolǵanynda emes. Qyrshynynan qıylǵan jas jigit. Biz bar bolǵany ádilettilikti suraımyz", – dep oıyn jetkizdi marqumnyń qurbysy.

Jantúrshigerlik jol apaty Astanada Máńgilik El jáne Kereı-Jánibek handar kósheleriniń qıylysynda juma kúni bolǵan. Keshe Almatyda Eskendirdi sońǵy saparǵa shyǵaryp saldy. Jas jigitpen qoshtasýǵa 300-den astam adam kelgen.