Qazirgi tańda sport salasyna kóp kóńil bólinýde. Osy oraıda Batys Qazaqstan oblystyq dene shynyqtyrý jáne sport basqarmasynyń basshysy Ásıa Amanbaevamen suhbattasqan edik.
-Ásıa Rahymqyzy, BQO-daǵy olımpıadalyq jáne buqaralyq sport túrleriniń damýy men bolashaǵy týraly aıta ketseńiz.
- Óńirde sport salasynyń damýy kóńil qýantarlyq. Aıta ketsek, bıyl olımpıadalyq sport túrleri boıynsha ulttyq quramalar sapyna 237 batysqazaqstandyq sportshy ilikti. Iaǵnı jazǵy olımpıadalyq sporttan 205, qysqy olımpıadalyq sport túrinen 32 sportshy bolashaqta sporttyq dodalarda óner kórsetpek. Byltyr ulttyq quramada 219 sportshy bolǵan edi. Oblys sportshylary sporttyń olımpıadalyq emes 26 túrinen, jazǵy olımpıadalyq sporttyń 24 túrinen, qysqy olımpıadalyq sporttyń 4, paralımpıadalyq sporttyń 20, ulttyq sporttyń 8 túri boıynsha saralaýdan ótti.Aǵymdaǵy jyldyń bes aıynda Qazaqstan Respýblıkasynyń chempıonattarynda baq synaǵan 34 eresek, 12 jas, 46 jasóspirim sportshy júldeger atandy. Respýblıkalyq, halyqaralyq sporttyq-buqaralyq jáne saýyqtyrý is-sharalarynyń kúntizbelik josparyna 554 sporttyq shara engizildi. Búgingi kúni atalǵan jospardyń 83,1 paıyzy oryndaldy. Bul kórsetkish kúntizbelik jospardyń sapaly bekitilgenin jáne qarjynyń tıimdi ıgerilýde ekenin kórsetedi. Qysqy olımpıadalyq sport túrlerin, sonyń ishinde shańǵy jarysy, sondaı-aq jeńil atletıka boıynsha bilikti jattyqtyrýshylardyń jetkiliksizdiginen atalmysh oıyn túrlerin damytýda qıyndyqtar kezdesip otyr. Oblysta balalar-jasóspirimder sport mektepterinde olımpıadalyq sport túrlerinen úsh halyqaralyq dárejedegi sport sheberi jáne 25 sport sheberi, 270 sport sheberligine kandıdat bolsa, 327 sportshynyń razrády bar.
- Óńirde sporttyq keshender jetkilikti me? Iaǵnı materıaldyq tehnıkalyq bazasy týraly aıta ketseńiz.
- Byltyr «Óńirlerdi damytýdyń 2020 jylǵa deıingi baǵdarlamasy» aıasynda jergilikti búdjet esebinen aýdandarda 24 sporttyq alań boı kóterse, Oral qalasynda «Samuryq Qazyna Trast» áleýmettik jobalardy damytý qory jáne «Street Workout» Qazaqstan qaýymdastyǵy esebinen 10 sporttyq alań salynyp, paıdalanýǵa berilgen. Sondaı-aq byltyr QPO b.v. kompanıasynyń esebinen Aqsaı qalasynda jáne jergilikti búdjet esebinen Zelenov aýdanynyń ortalyǵynda 160 orynǵa arnalǵan dene shynyqtyrý-saýyqtyrý kesheni salynǵan. Qazirgi tańda QPO b.v. kompanıasynyń esebinen Bórli aýdanynyń Bórli aýylynda sport kesheniniń qurylysy júrip jatyr. Atalmysh keshen tamyz aıynda paıdalanýǵa berilmek. Oblysymyz boıynsha Oral qalasy men Bórli aýdanynda ǵana derbes dene shynyqtyrý jáne sport bólimderi bar. Qalǵan 11 aýdanda mádenıet, tilderdi damytý, dene shynyqtyrý jáne sport bólimderi jumys isteıdi. Aýyldyq okrýgterde sport klýbtarynyń nusqaýshy-ádiskeriniń joqtyǵyna baılanysty buqaralyq sportty damytý jumysymen jastarmen jumys jónindegi resýrstyq ortalyqtyń mamandary aınalysyp otyr. Bıylǵy oqý jylynda áıelder kúresi men toǵyzqumalaqtan bólimsheler ashyldy. Olımpıada rezervterin daıarlaý ortalyǵynda akademıalyq esý, boks, grek-rım kúresi, erkin kúres, áıelder kúresi, velosport, short-trek, sadaq atý, taekvondo, voleıbol, jeńil atletıka, aýyr atletıka sekildi sport túrleri damytylýda. Atalmysh mektep-ınternatynda 247 bala tálim alyp, 26 jattyqtyrýshy qyzmet etip júr. Jas sportshylardyń 44-i ulttyq qurama komandasynyń músheleri.
-Aq Jaıyq óńirinde jasóspirimderge arnalǵan qansha sport klýby bar?
-Óńirde 23 balalar-jasóspirimder sport mektebi bolsa, onyń ekeýi olımpıada rezerviniń mamandandyrylǵan mektebi. Sonymen qatar olımpıada rezervterin daıarlaý ortalyǵy, oblystyq joǵary sporttyq sheberligi mektebi, sportta daryndy balalarǵa arnalǵan mamandandyrylǵan oblystyq mektep-ınternaty, 11 sport klýby, onyń ishinde «Aqjaıyq» sport klýby, «Jaıyq» voleıbol klýby, «Aqjaıyq» fýtbol klýby sekildi kásipqoı klýbtar jumys isteıdi. Qazir 12 aýdannyń jeteýinde buqaralyq sportty damytý boıynsha sport klýbtary jumys jasaıdy. Olar Aqjaıyq aýdanyndaǵy «Jiger», Bórlidegi «Aqsaı», Qaztalov aýdanyndaǵy «Aıbyn», Qaratóbe aýdanyndaǵy «Qaratóbe», Syrymdaǵy «Qaısar», Tasqaladaǵy mádenı-saýyqtyrý klýby men Shyńǵyrlaýdaǵy sport klýby.
