QR DİAQM Jastar saıasaty departamenti «Jas Ulan» BBJU jáne «Bolashaq» stıpendıattarynyń qaýymdastyǵy» QB birlesip Astana qalasy «Atameken» Qazaqstan kartasy» etno-memorıaldyq kesheni aýmaǵynda ashyq aspan astynda «Kıeli Túrkistan» atty ashyq dáris ótkizdi.

İs-sharaǵa ǵylym jáne shyǵarmashylyq zıalylary, qoǵam qaıratkerleri men saıasattanýshylar  QR Din isteri jáne azamattyq qoǵam mınıstrliginiń ókilderi, respýblıkalyq jastar uıymdarynyń basshylary men belsendileri qatysty.

İs-shara aıasynda Memleket tarıhy ınstıtýty dırektorynyń orynbasary Amangeldi Qashqymbaev jastar úshin elimizdiń saıası ári rýhanı ómirindegi Túrkistan qalasynyń tarıhı róli týraly tanymdyq dáris oqyp, rýhanı ordamyzdyń tarıhı faktileri týraly aıtyp berdi.

Sondaı-aq, jýrnalıs, QR Prezıdenti janyndaǵy Jastar saıasaty jónindegi keńestiń múshesi Qanat Áýesbaı qatysýshylar  arasynda Túrkistan qalasynyń tarıhyn bilý  týraly suraq-jaýap saıysyn ótkizdi.

Aksıanyń maqsaty - jastardyń el tarıhyn bilýge qyzyǵýshylyqtaryn arttyrý, mádenı jáne rýhanı qundylyqtarǵa baýlý,  Túrkistan qalasy ákimshilik ortalyǵymen jańadan qurylǵan Túrkistan oblysynyń  ımıjin nyǵaıtý bolyp tabylady.

2018 jylǵy 19 maýsymda Elbasy Shymkent qalasy respýblıkalyq mańyzy bar qalalardyń sanatyna jatqyzý jáne oblystyq ortalyǵy – Túrkistan qalasymen jańadan ákimshilik-aýmaqtyq birlik Túrkistan oblysyn  qurý boıynsha Jarlyqqa qol qoıǵanyn esterińizge salamyz. 

Memleket basshysy Shymkent bizdiń eldiń ǵana emes, búkil Ortalyq Azıa óńiriniń ınvestısıalar, tehnologıalar jáne ıntellektýaldy resýrstardy shoǵyrlandyratyn jańa ortalyǵyna aınalatynyn belgilep, sondaı-aq onyń odan ári ilgerileýine septigin tıgizetinine jáne qalanyń aldynda jańa perspektıvalar ashylatynyn atap kórsetti.