Semeı stansıasynan Jalańashkól stansıasyna deıin Alakól jaǵalaýyna jetkizetin qalaralyq poıyz kestesi iske qosylyp, jańa qalaralyq poıyz jolǵa shyqty.

Poıyz Semeı stansıasynan 17 saǵat 45 mınýtta shyǵyp, Jalańashkólde 8 saǵat 27 mınýtta bolady. Jolda 14 saǵat 42 mınýt júredi. Keri qaraı Jalańashkólden Semeıge qaraı jolaýshylar jup kúnderi shyǵa alady.

«Poıyz jolaýshylardy Jalańashkól stansıasyna deıin jetkizedi. Olar ári qaraı avtokólikpen barady. Úlken kisilerge bılet quny 2862 teńge turady. Qazirdiń ózinde 100 otyratyn orynǵa bılet satyldy»,-deıdi «Qala mańy tasymaly» AQ sarapshysy Serik Dóńbaev.

Qazirgi tańda «Qala mańy tasymaly» AQ Respýblıkamyzdaǵy 67 baǵdarǵa qyzmet kórsetedi. Endi Shyǵys Qazaqstanǵa jańa baǵdar ashyldy.

Temirjolda 26 jyldan beri eńbek etetin jolserik Zámzágúl Mamanova poıyzda jolaýshylarǵa qolaıly jaǵdaı jasalǵandyǵyn aıtady. Jolaýshylar jolserikterdiń qyzmetine jáne sońǵy stansıaǵa jaıla vagonmen jetetindigine rızashylyqtaryn bildirip jatyr.

Buryn Alakólge demalýǵa barýshylar avtokólikpen ǵana shyǵatyn. Olar avtobýsta kóp jol azabyn shegetin. Sondyqtan Óskemendikter kóbine Buqtyrma sý qoımasynyń Kógildir jaıylmasyna demalýǵa baratyn.

Qazir Alakóldiń shıpajaıyna baratyndar sany kóbeıdi. Endi jolaýshylardyń suranysyna oraı, otbasymen demalýshylarǵa jaqsy jaǵdaı jasalýda.

Atap óterligi, bıylǵy 21 maýsymda Óskemen-1 stansıasynan alǵashqy poıyz saparǵa shyǵyp, Alakól jaǵalaýyna jolaýshylardy jetkizdi.