Elbasynyń halqyna arnaǵan Joldaýynda kórsetilgen maqsattar men mindetterdi oryndaýda Atyraýda da birqatar jumystar atqarylýda, dep jazady qamshy.kz aqparat agenttigi Atyraý gazeti taratqan aqparattarǵa súıenip.
Sándi oıyn-saýyq keshenderi men bıznes ortalyqtarynyń, kóp qabatty turǵyn úılerdiń ǵımarattaryn salý jumystary qarqyndy júrgizilýde. Kóshelerdi keńeıtý, abattandyrý, jaryqtandyrý isi qala ortalyǵymen qatar, qala mańyndaǵy aýyldarda da jalǵasyn taýyp otyr.
Táýelsiz eldiń erteńi – jastar qolynda. Endeshe olardyń sportpen kóbirek shuǵyldanýyna, shyǵarmashylyq baǵytta shyńdalýyna, turǵyndardyń mádenı-demalysyn uıymdastyrýǵa basa nazar aýdarylǵan. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrýda Atyraý, Aqsaı aýyldyq okrýgterinde zamanaýı dene shynyqtyrý-saýyqtyrý keshenderi salyndy. Baǵdarlama aıasynda qala ortalyǵynda «Teńizshevroıl» JSHS-niń demeýshiligimen «Retrosaıabaq» paıdalanýǵa berildi. Jumysker shaǵynaýdanynda mádenıet úıi óz kórermenderine esigin aıqara ashty. Atalǵan nysandar qala kórkine kórik qosyp qana qoımaı, atyraýlyqtar men qonaqtar úshin tamasha demalys oryndarynyń birine aınaldy.
Sonymen qatar, Erkinqala, Aqjar, Jańatalap aýyldarynda tıptik úlgidegi mádenıet úıleriniń qurylysy jalǵassa, Elordanyń 20 jyldyq merekesine oraı Tomarly aýylynda salynǵan 400 oryndyq kelbetti mádenıet úıiniń paıdalanýǵa berilýi aýyl turǵyndaryna erekshe syı bolmaq.
Elbasy men Táýelsizdik jáne Elbasy men Astana uǵymdary – bir-birinen ajyramas egiz uǵymdar. Elbasynyń eren eńbegimen Táýelsizdik alǵan alǵashqy jyldary elimizdiń ózge óńirleri sıaqty munaıly astana da shyraıly shaharǵa aınala bastady. Qalanyń ejelgi tarıhı ataýy qaıtarylyp, «Atyraý» qalasy bolyp ataldy. Erkindik pen táýelsizdiktiń jolynda qol bastaǵan Isataı Taımanuly, Mahambet Ótemisuly syndy batyr da aqyn, daýylpaz kúıshi babalarymyzdyń esimderi qos aýdanǵa berildi. Qos atqa qatar qonǵan batyr babalarymyzdyń qurmetine oblys ortalyǵynda qoladan quıylǵan eskertkish músinderi ornatyldy.
Qarqyndy damyǵan jas memleketimizdiń ár jyly tarıh qoınaýyna erekshe oqıǵalarmen endi. Qalanyń sáýlettik kelbetine kórik berer birneshe eskertkishter men memorıaldar, kishi-sáýlettik nysandar salyndy. Tek qana sońǵy jyldardyń ózinde Uly Jeńistiń 70 jyldyǵyna oraı «Jeńis» saıabaǵynda maıdan dalasynan oralmaǵan 27 myńnan astam bozdaq babalarymyzdyń esimi jazylǵan «Estelik taqta» memorıaly ashylsa, aýǵan, tájik-aýǵan jerindegi soǵysta janqıarlyqpen qaza tapqan erjúrek uldarymyzǵa arnalyp eskertkish turǵyzyldy. Memlekettik Gımn avtorlarynyń biri Jumeken Nájimedenov pen Memlekettik syılyqtyń laýreaty, poezıa padıshasy Farıza Ońǵarsynovaǵa eskertkishter ornatyldy.
Elbasynyń baǵdarlamalyq maqalasy kóptegen ıgi isterge jol ashyp, jańasha serpin berdi. «Ótkendi bilmeı, bolashaqty boljaý múmkin emes» degen halyq danalyǵyn ustanǵan oblys, qala basshylyǵy ulttyq qundylyqtarymyzdy ulyqtap, dástúrimizdi dáripteýge arnal-ǵan, Otanyn, ultyn súıýge, urpaq tárbıesine erekshe áser beretin sharalarǵa úlken mán berip, aıryqsha qoldaý kórsetip keledi. Oblys jáne shahar halqymen ótken kezdesýlerde aıtylǵan usynystar men pikirlerdi eskerip, Halyq qaharmany Hıýaz Dospanovanyń kishi-sáýlettik músinin, ult rýhanıatynyń aıtýly tulǵalary, Qazaqstannyń Halyq jazýshylary Ábý Sársembaev pen Hamıt Erǵalıevke, Memlekettik syılyqtyń laýreaty, dáýlesker kúıshi-kompozıtor Qarshyǵa Ahmedıarovqa arnap eskertkish ornatý qolǵa alyndy.
