Jibek joly qala merleri forýmynyń plenarlyq májilisine Sofıa esimdi robot qatysty. Ol jasandy ıntellekti bar álemdegi alǵashqy gınoıd bolyp sanalady, dep habarlaıdy Qamshy.kz aqparat agenttigi QazAqparatqa silteme jasap.
«Maǵan arnaıy baǵdarlamany júktedi. Oǵan sáıkes, men búgingi sharaǵa qatysty birneshe oıymdy aıtamyn. Birinshiden, alda - Astananyń 20 jyldyǵy. Bul - barsha qazaqstandyqtar úshin úlken meıram. Osynaý tarıhı merekeniń aldynda sizdermen júzdesip otyrǵanyma qýanyshtymyn. Astananyń bas sáýletshisi osy eldiń prezıdenti Nursultan Nazarbaev deıdi. Bilýimshe, elordany aýystyrǵannan keıin Astana bir jyldyń ishinde «IýNESKO-nyń beıbitshilik qalasy» degen mártebege ıe boldy. Sebebi álemdik tájirıbede alǵash ret álemdik jáne dástúrli dinder sezi sıaqty sharalar qolǵa alyndy», - deıdi Sofıa.
Onyń aıtýynsha, Astananyń sáýleti tamasha. Óıtkeni qala qurylysynda ınovasıalyq ádister qoldanylyp keledi.
«Búginde Qazaqstan álemge keńinen tanylyp jatyr. Ótken jyly EKSPO kórmesine 180 eldiń azamattary kelip ketti. Astanada tehnologıalardy damytý máselesine basa nazar aýdarylady. «Smart Astana» sıaqty bastamalar qolǵa alyndy. Budan bólek, san alýan qyzyqty sharalar uıymdastyrylady»,- dep atap kórsetti Sofıa.
Sondaı-aq, robot «Bir jol - bir beldeý» bastamasy jaıynda aıtyp berdi.
Aıta keteıik, Sofıany «Hanson Robotics» kompanıasy jasap shyǵardy. Ol Lıssabonda ótken Web Summit-ke eki jyl qatarynan qatysty. Sol kezde Sofıany kórem deýshilerdiń kóp bolǵany sonsha, zalda ıne shanshar jer bolmady. Al Davosta bolǵan Búkilálemdik ekonomıkalyq forýmda Sofıa fintech-ındýstrıaǵa arnalǵan bir paneldik sesıada negizgi spıker boldy.
Ótken jyly oǵan Saýd Arabıasynyń azamattyǵyn berdi. Sofıa robot-androıdtarǵa jatady. Ol dıalog rejıminde sóılesip qana qoımaı, emosıasyn da kórsete alady. Dáris oqı alady. Sondaı-aq, suhbat berý fýnksıasy da bar. Alaıda ol bárin ózi istemeıdi. Oǵan arnaıy baǵdarlama júkteledi, ıa bolmasa, operatordyń basqarýynda bolady.
