Jańa Zelandıanyń turǵyny Kler Nelson saıahat jasaýdy jaqsy kóretin.

Osy joly ol jalǵyz ózi shól daladan turatyn parkti júrip ótýdi jón sanaıdy. Bir aıta keterligi, bul birinshi tájirıbesi emestin. Alaıda sol kúni kútpegen jaǵdaılar oryn alyp, Kler saý basyna saqına tilep alady. Bul jumsartyp aıtqanymyz bolar. 

Jolǵa shyǵysymen-aq úlken bıik tasqa shyǵamyn dep aıaǵyn jaraqattap alǵan ol 4 kún is-qımylsyz jatady. İshetin sýy da taýsylǵan Kler kóńil-kúıdi túsirmeı, ózin barynsha sabyrǵa shaqyrýmen bolady. Sómkesinde júrgen aspırındi iship alyp, iske kóshedi. Eń birinshiden, ózimen birge jolǵa alyp shyqqan polıetılendi paketter arqyly kúnnen qorǵanysh bolar kóleńke jasaıdy. Kóleńkeniń astynda otyryp tańerteń-kúndiz demalsa, keshke-túnde tamaǵyn jyrtyp kómek suraýmen ýaqyt ótkizedi. Kúnnen qorǵaıtyn kremniń qutysyna óz zárin jınap, sony ishedi. BBC jýrnalıserine keıin suhbat bergen Kler bul qadamǵa amal joqtyqtan barǵanyn ári zárdiń dámi jaman syraǵa uqsas ekenin aıtyp beredi. Tórtinshi kúni aspanda ushyp bara jatqan tikushaqtyń shýyn estıgen Kler qolyndaǵy taıaqqa kıim baılap, ony  jalaý sıaqty jelbiretedi. Sonyń arqasynda ony qutqarýshylar baıqap qalady. 

Óziniń erik-jigeri arqasynda tiri qalǵan Kler Nelson qutqarýshylardy da tań qaldyrypty. 4 kún boıy assyz, sýsyz qalǵan áıel kelgen kómekke rıza bolyp, jylap-syqtaýdyń ornyna kúlip máz-meıram bolǵan desedi. Qazirgi tańda qaısar minezdi Kler jergilikti aýrýhanada em qabyldap, aıaqqa turyp júrýdi qaıtadan úırenip jatyr.

Saıahat jasaýdy jasaýdy jaqsy kóretin jıhankezderge Kler Nelson mynandaı aqyl-keńes aıtypty: «Kez kelgen joryqqa tyńǵylyqty daıyndalý qajet eken. Jaı ǵana uıaly telefonǵa senim artýdyń qajeti joq. Eger de sýsyz qalsańyz, ony barynsha únemdeýge tyrysyńyz. Bótelkeden ishkenshe shúberekti sýly etip sony soryńyz. Jáne eń bastysy kez kelgen jaǵdaıda kóńil-kúıińizdi túsirmeńiz».

Jazıra Baıdaly