Qazaqstannyń munaı aǵyny elordadan tikeleı basqarylatyn bolady. Búgin «Samuryq-Qazyna» UÁQ» AQ Basqarmasynyń Tóraǵasy Ahmetjan Esimov «QazTransOıl» aksıonerlik qoǵamynyń jańa Bas dıspecherlik basqarmasyn iske qosty. Munda magıstraldyq munaı qubyrlary júıesi boıynsha munaı aǵynyn basqarý ortalyqtandyrylǵan jáne sıfrlandyrylǵan.

«QazTransOıl» AQ munaıdy qabyldaýdy jáne tapsyrýdy, «Aqtaý» porty men kompanıanyń temirjol estakadalarynda munaı quıýdy Bas dıspecherlik basqarmasynan onlaın rejımde qadaǵalaıtyn bolady. Osy arqyly  «QazTransOıl» aǵyndy dıspecherlik baqylaý jáne basqarý SCADA júıesin engizý boıynsha jobany tolyq júzege asyrdy. 

 «QazTransOıl» kompanıasyndaǵy sıfrlyq tehnologıalar qazaqstandyq munaıdy elimizdiń munaı óndeý zaýyttaryna jetkizýdi, Qara jáne Baltyq teńizderiniń porttary arqyly Qytaıǵa jáne Ózbekstanǵa eksporttaýdy basqarýǵa, sondaı-aq reseılik munaıdy QHR men Ózbekstanǵa tranzıtteýge jańa múmkindikter beredi.

«QazTransOıl» AQ-daǵy  dıspecherlik basqarmanyń burynǵy qurylymy tórt deńgeıli satydan turatyn: jergilikti dıspecherlik pýnktiler (JDP), aýdandyq dıspecherlik pýnktiler, ortalyq dıspecherlik pýnktiler jáne Astanadaǵy Bas dıspecherlik basqarma. Qazirgi ýaqytta qurylymda tek JDP men BDB ǵana qaldy, ıaǵnı 2 deńgeı ońtaılandyryldy.

Sonymen qatar, «Samuryq-Qazyna» Qorynyń basshysy Ahmetjan Esimov qaıta qalpyna keltirý jumystary júrgizilgen Aqtóbe oblysyndaǵy «Keńqıaq» bas munaı aıdaý stansasyn sıfrly tehnologıalar arqyly  Bas dıspecherlik basqarmadan iske qosty.

«Keńqıaq» bas munaı aıdaý stansasynyń iske qosylýy qazaqstandyq munaıdy QHR-ǵa eksporttaý kólemin ulǵaıtýǵa, Batys Qazaqstan munaıyn otandyq MÓZ-derge tasymaldaýdy qamtamasyz etýge  múmkindik beredi.