BQO-nyń  Aqjaıyq aýdanyna qarasty Shabdarjap mektebiniń  oqýshylary jańa oqý jylynda Bilimbook kompúter-transformerlerin paıdalanatyn bolady. Shabdarjap aýyly – Oral qalasynan  300 shaqyrym jerde, Atyraý oblysynyń shekarasynda jatqan shalǵaı eldi meken. Munda 198 oryndyq mektep ǵımaratynyń qurylysy tolyq aıaqtalyp, jańa oqý jylyna shákirt qabyldaýǵa saqadaı saı.

- Astananyń toıy, Elordanyń 20 jyldyǵy – búkil qazaqstandyqtardyń ortaq qýanyshy. Dál osy kúni Oral qalasynan shalǵaı jatqan shaǵyn aýylda osyndaı zamanaýı mektep ǵımaraty paıdalanýǵa berilýi tegin emes. Elimizdegi tynyshtyqtyń, ekonomıkalyq damýdyń, Elbasy saıasatynyń naqty jemisiniń bir kórinisi – osy, - dedi oblys ákimi Altaı Kólginov turǵyndarmen kezdesýde.

- Sońǵy jyldary munda jyl saıyn 2-3 úı jańadan salynady eken. Bıyl aýyl kásipkeri Talǵat Muhamedıarovtyń bastaýymen aýyl ishinde jazǵy tehnıkalyq sý júıesin júrgizdi. Bul degenińiz – ár aýlada baý-baqsha ósirýge keremet múmkindik. Qazir aýylda 745 adam turady. Ótken oqý jylynda mektepte 154 oqýshy bolǵan edi. Bıyl kúzde jańa mektepke 165 oqýshy kelgeli otyr, - dedi Taıpaq aýylynyń ákimi Bolat Baıǵalıuly.
Sonymen qatar, jumys saparymen kelgen óńir basshysyna Aqjaıyq aýdanynda memlekettik baǵdarlamalardyń júzege asyrylýy týraly esep berildi. Aýdan ákimi Ádil Jolamanovtyń aıtýynsha, Shabdarjap jáne Tompaq aýyldaryna aýyz sý qubyryn tartý jumystary bastaldy, bul jobaǵa 445,7 mln.teńge qarastyryldy. Nátıjesinde eki aýyldyń 1000-nan astam turǵyny taza aýyz sýmen qamtylatyn bolady. Sondaı-aq, aýdannyń 14 eldi-mekeninde aýyz sýmen qamtý jumystary júrgizilýde. Oǵan qosa, soltústik-batys aımaǵynda elekt jelisimen jabdyqtaý jumystary júrgizilýde. Aýdan ortalyǵynda 3 qabatty 24 páterlik turǵyn úı qurylysy, aǵymdaǵy jyly 4000 astam sharshy metr úı salý týraly baıandaldy. 
Sapar sońynda óńir basshysy aýdannyń áleýmettik-ekonomıkalyq damý kórsetkishterin jaqsartý boıynsha birqatar tapsyrmalar berdi.