Astananyń 20 jyldyǵy qarsańynda Almaty qalasy ishki saıasat basqarmasynyń tapsyrysymen «El-shejire» qoǵamdyq qory fleshmob uıymdastyrdy. Atalmysh shara Almaty qalasyndaǵy arbatta ótti.

Aksıanyń maqsaty- qala turǵyndary Astanany jańa jasymen quttyqtap, Alataýdan Arqaǵa ystyq sálemin joldaý.

Sharaǵa Almaty qalasynyń  belsendi stýdentteri men jalpy orta mekteptiń oqýshylary, sondaı-aq "Almaty jastary" Jastar resýrstyq ortalyǵynyń eriktileri qatysty. 100-ge jýyq jastar astanaǵa degen mahabbatyn, sezimin  kórsetý maqsatynda júrek belgisin beıneledi.

Fleshmobqa atsalysqan jastardyń deni el astanasymen túıdeı qurdas. 20-ǵa jetken órender qatarynda Baný Qurbanbaeva da bar. Ol Elordaǵa áli aıaq basyp kórmese de, júregin únemi maqtanysh sezimi kerneıtinin jetkizdi. Buǵan qosa, « Astana- búginde alyp qalalar qataryna qosyldy. Ózge elmen terezesi teńesip, keregi qataıǵan, bosaǵasy berik shahar. Bıylǵy jyly mindetti túrde baryp, óz kózimmen kórip qaıtpaqpyn. EXPO 2017 halyqaralyq kórmesin barlyq bizden barǵan qonaqtar aýyz toltyra maqtap keldi. Kún saıyn kórkeıip kele jatqan qalanyń qarqyny bárimizdi qýantady. Ósip, kórkeıe bersin»- dep ystyq yqylasyn bildirdi.

Fleshmobtyń arty konserttik baǵdarlamaǵa ulasyp, arnaıy jasalǵan tort tartý etildi. Sonymen qatar, Astanamen bir kúnde týylǵan 7 stýdentke arnaıy syılyq syılady.