Facebook áleýmettik jelisinde Túrkistan qalasyndaǵy kóp qabatty páterde bolǵan qaıǵyly oqıǵaǵa qatysty vıdeo tarady, dep jazady Qamshy.kz aqparat agenttigi.
Túrkistan qalasynda aǵymdaǵy jyldyń 1 shildesinde 9 úı, 56 páterde Oralbek Araılym Baýyrjanqyzy esimdi 15 jastaǵy qyzdy toq uryp, qyz kóz jumdy.
Turǵyndar qaıǵyly jaǵdaıdan keıin dabyl qaǵyp, istiń mán-jaıy tekserilýin talap etip otyr. Olardyń aıtýynsha, turǵyndardy toq soqqan jaǵdaı jıi bolyp turady. Olar óz ómiri men jaqyndarynyń ómiri úshin alańdap otyr.
«Jaqynda toqtardy tekserdi. Tekseris barysynda dálizden peshke jalǵanatyn zat joq bolyp shyqqan. Adamdar peshke jaqyndasa toq uryp jatyr. Edendi jýǵanda peshke jaqyndap qalsań kádimgideı laqtyrady. Áıelimniń basynan sondaı jaǵdaı ótken. Qyzdy keshki 9.30 ben 22.00 aralyǵynda toq ursa, áıelimdi sol kúni tańǵy 9-dar shamasynda urdy. Bul úıdi jınap jatqanda bolǵan jaǵdaı» deıdi turǵyn.
Araılym Oralbektiń týǵan ápkesi Yrysaldy Oralbek qyzdy qýaty kúshti toq urǵanyn aıtady. Ol máıithanada qyzdyń qasynda bolǵan.
«Meni 9.30-da inim qońyraý shalyp shaqyryp aldy osy jerge. Men taksımen kelemin degenshe olar sińlimdi aýlaǵa kómip qoıǵan eken. Úmit qoı. Tańǵy saǵat jetide bolmady. Tań erteń jedel járdem keldi. Olar kelgende onyń qaıtys bolǵanyn aıtty. Máıithanaǵa alyp ketti. Ózim basy qasynda boldym. Eń kúshti toqpen urǵan deıdi. Arqasynyń bári kúıip ketken. Óz kózimmen kórdim ony. Toqty qolymen ustaǵan. Ol qulaqtan shyqqan. Qulaǵy qantalaǵan. Qulaq tusynyń bárin kesip kórdi. Arqasy tolyǵymen kúıip ketken. Sińlim qaıtyp kelmeıdi ǵoı, biraq mundaı jaǵdaı basqa adamnyń basynan ótýi múmkin ǵoı» deıdi marqumnyń ápkesi.
Álibaeva Yrysaldy Baýyrjanqyzy ózi jalǵyzbasty ana ekenin jáne onyń 5 balasy bar ekenin aıtady. Sińlisinen aıyrylyp, qan jutyp otyrǵan ol balalary úshin de alańdap otyr.
«Jumysqa ketkende balalarymdy atasynyń úıine tastap ketemin. Balalarymnyń basynan mundaı jaǵdaı ótpesine kim kepil? Kim jaýap beredi? Sińlim mynandaı bolyp otyr. Endi men qalaı jumys isteımin?» deıdi ol.
Kóp qabatty úı turǵyndarynyń aıtýynsha, qaıǵyly oqıǵa bolǵan kúni ákimdik, prokýratýra men úıdi salǵan fırma basshylyǵy boıy kórsetpegen. Qyzynan aıyrylǵan Araılymnyń ákesi úıdi salǵan fırma basshysy men ákimdik, prokýratýraǵa óz renishin jetkizdi.
«Ákimdik, prokýratýra men úıdi salǵan fırmanyń bir de bir ókili «myna jerde ne bolyp jatyr?» dep kóńilimizdi suramaq túgili, qarasyn da kórsetpedi. Qyzymyzdan aıyrylyp otyrmyz ǵoı. Jaǵdaıdy da bilisken joq. Qyzdyń sheshesi de joq. Jalǵyz ózim tárbıelegenmin» deıdi marqumnyń ákesi.
Osy jaǵdaı boıynsha istiń mán-jaıyn anyqtaý úshin Túrkistan qalasy ákimdigine habarlastyq. Ákimdiktiń bergen málimetine saı, №9 úıdegi toqqa qatysty másele tekserilip jatyr.
- Osy is boıynsha tergeý jumystary júrgizilip jatyr. Barlyq jaýapty bólimderden, tenderdi alǵan adamdardyń jumystary tekserilýde. Tergeý jumystary aıaqtalǵannan keıin naqty sheshim shyǵady. Atalmysh is boıynsha arnaıy komısıa da qurylǵan, deıdi ákimdiktiń BAQ-pen baılanys qyzmetiniń ókili Madına Baıǵut.
