Batys Qazaqstan oblysynyń Darıan aýylynda jastardyń bıznes, shyǵarmashylyq, oqý baǵdarlamalary aıasyndaǵy kreatıvti jobalaryn jaryqqa shyǵaryp qana qoımaı, ony júzege asyrýǵa múmkindik beretin kovorkıng ortalyǵy ashyldy.
Zelenov aýdanynyń ortalyǵy Darıan aýlynda ashylǵan kovorkıng ortalyǵy «Shabyt» dep ataldy.
- Jastar – qoǵamnyń qozǵaýshy kúshi. Degenmen qazirgi tańda jastarymyzdyń kitaphanǵa kelýi azaıdy. Aýyl jastarynyń ıgiligine berilgeli turǵan kovorkıng ortalyǵy degenimiz – kitaphanaǵa eńbektegen baladan eńkeıgen qarıaǵa deıin adamdardy tartýdyń jańa ádisi. Sondaı-aq ortalyq jastardyń óz múmkindikterin tolyq paıdalanyp, shyǵarmashylyq jáne basqa da qabiletterin damytýǵa da úlken septigin tıgizedi. El bolashaǵy jastarǵa qoldaý kórsetý týrasyndaǵy jumystar áli de jalǵasatyn bolady. Qazaqstanymyz básekege qabiletti úzdik elý el qataryna ensin desek, jastardy qoldaýymyz kerek, – dep jınalǵandardy ortalyqtyń ashylýymen quttyqtady. Jastarǵa úlken múmkindikter beretin ortalyqtyń ashylý saltanatynda respýblıkalyq pándik olımpıada jeńimpazy, Darıan jalpy orta bilim beretin qazaq mektebiniń 11-synyp oqýshy Danıara Ǵalıeva sóz alyp: – Aýyl jastary osy ortalyqtyń ashylýyn kópten kútti. Kovorkıng ortalyǵy jastardyń jan-jaqty damýyna múmkindik beretin bolady. Munda jastar úshin barlyq jaǵdaı jasalǵan. Oqımyn, izdenemin, jańa dostar tabamyn degen jandardy bos ýaqytyn kovorkıng ortalyǵynda ótkizýge shaqyramyn. Jáne de osyndaı tamasha oryn salyp bergen aýdan basshylyǵyna rızashylyǵymyz sheksiz, – dedi.
Darıan modeldi balalar kitaphanasynyń janynan ashylǵan kovorkıng ortalyǵy birneshe aımaqqa bólingen. Alǵashqysy – jumys aımaǵy. Ol jerde kelýshiler arnaıy qoıylǵan kompúterlerge otyryp, elektrondy úkimet portalyna kire alady. Ekinshi kompúterge otyrǵan jan ǵalamtor arqyly ózine kerekti aqparatty alyp qana qoımaı, áleýmettik jelilerge kirip, ýaqyt ótkizýge múmkindik bar. Kovorkıng ortalyǵyna kelýshiler jumys aımaǵynan aýdannyń tarıhy jaıynda da derek ala alady. Ol úshin arnaıy kompúter de qoıylǵan. Aldaǵy ýaqytta Ǵ.Ótebálıev, T.Abdrahmanov, T.Kýdráshova sıaqty jergilikti ólketanýshylardyń da eńbekteri sıfrlanyp, ortalyq qoryna qosylmaq. Darıandyqtardy úlken qýanyshqa bólegen ortalyq qyzmetkeri Márzıa Qonysbaeva: – Bolashaqta óńirimiz ben elimizdegi basqa kovorkıng ortalyqtarymen hat-habar almasyp, tájirıbelerimen bólisip turatyn bolamyz. Jastar úshin jasalǵan ortalyqa bıznes-trenıngter men túrli sheberlik saǵattary, ıntellektýaldy oıyndar men debattar jáne aǵylshyn tilin úıretý kýrstary da ótkiziletin bolady. Sondaı-aq vıdeorolıkterdi montajdaý, fotoónerge baýlý men dızaınerlerdiń sheberlik saǵattaryn ótkizýdi josparlap qoıdyq. Kishkentaı búldirshinder úshin de ortalyqqa túrli fılmder kórip, qyzyqty oıyndar oınaıtyn bolady, – dedi Zelenov aýdanynyń ákimi Asqat Shaharov.
Budan bólek «Shabyt» kovorkıng ortalyǵynda ústel tenısi, toǵyzqumalaq, asyq, drats oıyndaryn oınap, kóńil kóterýge bolady. Tabıǵatty súıetin jandar bolsa, totyqus pen akvarıýmdaǵy balyqtardy tamashalaı alady. Kovorkıng ortalyǵy qyzmetkerleri men aýyl jastary ortalyqta iske asyrar ıdeıalarynyń kóp ekendigin alǵa tartady.
