«Samuryq-Qazyna» AQ men Qor qorjynyndaǵy kompanıalar kreatıvti jas IT-mamandaryn jumysqa alady. Bul týraly baǵdarlamanyń ashylý saltanatynda «Samuryq-Qazyna» UÁQ» AQ Operasıalyq qyzmet jónindegi basqarýshy dırektory Álisher Pirmetov málimdedi. Onyń aıtýynsha, jańa tujyrymdamalyq baǵdarlama «Sıfrlyq Qazaqstandy» damytý aıasynda júzege asyrylǵan. Bul baǵdarlama taǵylymdamadan ótý barysynda týyndaǵan qandaı da bir ıdeıalardy iske asyrý yqtımaldylyǵyn baǵalaýǵa múmkindik beredi.
«Elbasy aıtyp ketkendeı, búgingi tańda el básekege qabiletti bolý úshin paıdaly qazbalar jetkiliksiz, ol úshin memleket, ásirese, sıfrlyq tehnologıalar salasynda aldyńǵy qatarda bolýy kerek. Biz «Samuryq-Qazyna» AQ kompanıalar toby retinde sandyq tehnologıalardy damytýǵa múddelimiz»,- dep atap ótti Álisher Pirmetov.
Esterińizge sala keteıik, 2018 jyldyń 6 maýsymynda «Samuryq-Qazyna» UÁQ» AQ men Qorjyndyq kompanıalarynda «Sıfrlyq jaz 2018» taǵylymdama baǵdarlamasy bastaldy. Osy baǵdarlamanyń biregeı erekshelikteriniń biri – taǵylymdamadan ótýshi jastar básekelestigi joǵary IT salasynda qundy tájirıbe men bilim alady, SAP, Microsoft, Oracle, Cisco, HP, IBM, Huawei kompanıalarynyń ónimderimen jumystaryn shyńdaı alady.
Ótinim 6-30 maýsym aralyǵynda qabyldandy. Taǵylymdamanyń ózi 9 shildeden bastap 7 qyrkúıekke deıin Astana, Almaty, Óskemen, Pavlodar, Atyraý qalalarynda ótkiziledi.
Joǵarǵy oqý oryndaryn 2016, 2017 jáne 2018 jyldary bitirgen stýdentter «Sıfrlyq jaz – 2018» baǵdarlamasyna «Samuryq-Qazyna» UÁQ» AQ resmı www.sk.kz saıtyna kirip, ótinim qaldyrdy. Aqparattyq tehnologıalarǵa degen qyzyǵýshylyq jáne Qor kompanıalarynda aqparattyq tehnologıalarynyń damýyna úles qosý baǵdarlamanyń negizgi talaby bolyp sanalady.
Taǵylymdamaǵa qatysý úshin kásibı tájirıbeniń bolýy mindetti emes. Aqparattyq júıeler men ınfraqurylymdy ákimshilendirý, jobalyq basqarý, baǵdarlamalaý, qosymshalar arhıtektýrasy, aqparattyq qaýipsizdik qaǵıdalary salasynda negizgi bilim qajet. Bul taǵylymdama tólenbeıdi. Qor turý jáne kólik shyǵyndaryn ótemeıdi.
Úsh apta ishinde bul baǵdarlama úlken suranysqa ıe boldy. Ótinim bergenderdiń sany 2100-ge jetip, olardyń 500-i negizgi IT bilimin tekseretin synaqtan súrinbeı ótti, sonyń ishinde 72 jas maman taǵylymdamaǵa shaqyrylady.
Baǵdarlama qorytyndysy boıynsha úzdik tanylǵan 33 jas maman kelesi kompanıalar tobynda jumysqa ornalasý múmkindigine ıe bolmaq: «QazMunaıGaz» UK» AQ, «Qazatomónerkásip» UAK» AQ, «Qazaqstan temir joly» UK» AQ, «Qazposhta» AQ, «Samuryq-Energo» AQ, «Qazaqtelekom» AQ, «Taý-Ken Samuryq» AQ, «KOREM» AQ, «Qazaq Air» AQ, «Energoınform» AQ, «Samuryq-Qazyna Kontrakt» JSHS jáne «Birikken hımıalyq kompanıa» JSHS.
