Alımuhammed Quttumuratuly oblys ortalyǵynyń birneshe yqsham aýdanyn tekserip, qaramaǵyndaǵylarǵa qozǵalys kóp jol qıylystaryn retke keltirý, qala ortalyǵyndaǵy qoqys jáne qurylys qaldyqtary problemasy, sondaı-aq turǵyn úılerdiń qasbetterindegi aqaýlardy joıý men jol jıegindegi ıesiz jer ýchaskelerin kóriktendirý máseleleri boıynsha birqatar naqty tapsyrmalar berdi.
Qalany aralap shyǵý barysynda qala ákimi qaladaǵy avtomobıl joldarynda kóliktiń óte kóptigin atap kórsetip, qaramaǵyndaǵylarǵa qalanyń qozǵalys kóp jol qıylystaryndaǵy qoldanystaǵy oń burylystardy keńeıtý jáne jańalaryn salý jobasyn ázirleýdi tapsyrdy.
Birinshi kezekte Baımuhanov – Berǵalıev, Beıbarys – Amandosov, Beıbarys – Qurmanǵazy, Taımanov – Begeldınov, Vladımırskıı – Ǵumarov kósheleriniń qıylystary belgilendi.
Atalǵan kóshe qıylystarynyń birqatarynda burylystardyń bar ekenin, alaıda olardyń ensiz bolýynan avtokólik ıeleriniń joldarda manevr jasaýy problema týǵyzatynyn aıta ketken jón.
- Oblys ákimi oblys ortalyǵyndaǵy joldarda qarbalas sátterde avtokólik keptelisterin barynsha retke keltirýdi tapsyrdy. Birinshi kezektegi mindet - qozǵalys kóp, úlken jol qıylystaryndaǵy qozǵalysty jeńildetý, aǵymdaǵy jyldyń sońyna deıin biz osy problemany sheshýge tıispiz, - dedi qaramaǵyndaǵylarǵa Alımuhammed Quttumuratuly.
Sonymen qatar qala ortalyǵynda qurylys qoqystarynyń jatýy men jeke ýchaskelerdiń qorshaýlarynyń, turǵyn úılerdiń qasbetteriniń jáne jaýyndy kúnderi adam óte almaıtyn balshyqqa aınalatyn jol jıekterindegi ıesiz jer ýchaskeleriniń kózge qorash jaı-kúıi qala basshysynyń renishin týdyrdy.
- Biz qala turǵyndaryn tazalyq saqtaý mádenıetine ádettendirýimiz qajet. Birinshi kezekte – qalany tazalaıtyn komýnaldyq qyzmetterdiń jumysyn kúsheıtý kerek, sońǵy ýaqytta turǵyndar bizdiń atymyzǵa kóptegen renishter bildirip jatady. Ekinshiden – kásipkerlerdi ózderiniń irgeles aýmaqtaryn kóriktendirýge, ýchaskelerindegi eski, qısaıǵan qorshaýlardy, qurylys qoqystaryn, aram shópterdi joıýǵa daǵdylandyrý qajet. Úshinshiden – turǵyn úılerdiń qasbetterin jaqsartý jáne jol jıegindegi jerlerdi, qalany sándi, estetıkalyq túrge keltirý qajet. Osynyń barlyǵyn biz aǵymdaǵy jyldyń sońyna deıin sheshýimiz qajet, - dep tapsyrma berdi Alımuýhammed Quttumuratuly.
Sonymen birge qala ákimi Geolog aýyldyq okrýginde bolyp, apatty jaǵdaıdaǵy jataqhananyń jaı-kúıimen tanysyp, turǵyndarmen áńgimelesti.
