Aǵymdaǵy jyldyń 4 shilde kúni Astana qalasynda shymyldyǵy túrilgen «Uly dala rýhy» festıvaliniń negizgi maqsaty - jastar arasynda ulttyq sport túrleriniń damýyna tyń serpin berý. Tórt aımaqty qamtıtyn jobaǵa elimizdiń barlyq óńirlerinen sportshylar qatysady. Saıypqyrandar kókpar, báıge, aýdaryspaq, teńge ilý, jamby atý, qazaq kúresi, toǵyzqumalaq, asyq atýdan synǵa túsetin bolady. Atalǵan jobanyń ıdeıa avtory QR Mádenıet jáne sport mınıstri A.Muhamedıuly. Búgin bul týraly OQO óńirlik komýnıkasıalar qyzmetinde ótken brıfıńte Respýblıkalyq Ulttyq jáne at sporty túrleri ortalyǵynyń dırektory Nursultan Ibragımov málim etti. 

Onyń aıtýynsha, 2018 jyldyń 13-15 shilde aralyǵynda respýblıkalyq «Uly dala rýhy» festıvaliniń alǵashqy jarystary ońtústik aımaǵynda ótedi. 

«Aıtýly sharanyń ashylý saltanaty kezinde ońtústik aımaqtyń jerebesi taıqazan ishine salynǵan teńge oramaldar arqyly anyqtaldy. Ońtústik aımaǵyna Qyzylorda oblysy, Jambyl men Túrkistan oblysy jáne Almaty qalasynyń komandalary irikteldi. Osy tórt óńirdiń sportshylary Shymkent qalasynda kókpar, qazaq kúresi, toǵyzqumalaq, asyq atýdan jarysqa qatysady. Áýeli «Qulager» atshabarynda 48 sportshy qatysyp, kókpardan jeńimpaz komanda anyqtalady. Al Á.Iýsýpova atyndaǵy kórkem gımnastıka zalynda qazaq kúresinen 8 salmaq boıynsha 32 balýan baq synasa, asyq atýdan 12 mergen ózara júırikti anyqtaıdy. Sondaı-aq, Shymkent qonaq úıinde toǵyzqumalaqshylar arasynda jarys ótedi. Jalpy ońtústik aımaqtaǵy irikteý jarysyna 160 sportshy qatysady dep kútilýde», - dedi Nursultan Ibragımov. 

Budan ózge, aýdaryspaq, jamby atý, teńge ilýden jarystar Astana qalasyndaǵy «Qazanat» atshabarynda ótedi. Bul dúbirli dodada 5 salmaq boıynsha 20 balýan arasynda aýdaryspaq alyptary, quralaıdy kózge atqan 12 jambyshylar mergenderi jáne jelden júırik 12 teńge ilýshiler arasynda myqtylar anyqtalady. 

Jarystyń jeńimpazdary men júldegerleri Qazaqstan Respýblıkasynyń Mádenıet jáne sport mınıstrliginiń kýbok, medaldarymen marapattalady.