Bul týraly oblys ákimi J.Túımebaev Túrkistan qalasyn túrki áleminiń rýhanı-mádenı ortalyǵy retinde damytý boıynsha ótken jıynda aıtty.

Basqosýda sóz bastaǵan aımaq basshysy 1500 jyldan astam tarıhy bar Túrkistannyń ótkeninen az-kem syr shertti. Qazaq handyǵynyń astanasy bolǵan bul meken búkil túrki áleminiń de  rýhanı-mádenı astanasy bola bilgenin jetkizdi. Sonymen qatar, atalǵan tarıhı shahardy Elbasynyń tapsyrmasyna sáıkes,  Qazaqstannyń rýhanı ortalyǵy baǵytynda jandandyrý jaıyna toqtaldy.

«Túrkistan qalasynda boı kóteretin turǵyn úıler kóp qabatty bolmaıdy. Sebebi, Qoja Ahmet Iassaýı kesenesiniń bıiktiginen aspaý kerek. Barlyq jerde mavzoleı múmkindiginshe kórinip turýy qajet. Sondaı-aq, baspanalar Orta-Azıalyq stılde, ıaǵnı kóne dáýirdegi sáýletpen salynýy tıis. Sonda elimizdegi, kem degende, bir qala osyndaı eski kelbetpen boı kóteredi»,-dedi J.Túımebaev.

Túrkistan qalasyn týrıser úshin qolaıly  aımaqqa aınaldyrý máselesin sóz etken óńir basshysy munda jańadan áýejaı, temirjol vokzaly men avtovokzal jáne qonaq úıler, dámhanalar salynatynyn atap ótti.

Budan bólek, ákim Q.A. Iassaýıǵa qatysty jarıalanǵan qundy jádigerlerdiń kóptiginen arnaıy Iassaýı mýzeıi salyný qajettigine de toqtaldy.

Jıyn barysynda J.Túımebaev Elbasy tapsyrmasynyń aıasynda respýblıkanyń árbir oblysy Túrkistan qalasyna bir ǵımarattan salyp, syıǵa tartatynyn jetkizdi. Máselen, Astana qalasynyń ákimi Á.Isekeshov «Astana» saıabaǵyn salý týraly usynys bildirgen.