Parıjde zamanaýı qazaq ádebıetiniń eki antologıasyn fransýz tilinde taratý, basyp shyǵarý jáne aýdarý jumysyna aralasatyn shyǵarmashylyq konsorsıýmnyń qatysýshylary anyqtaldy.
Joba qatysýshylary Parıjdiń birinshi okrýginiń merıasy men elordalyq mádenı birlestiktiń qoldaýymen irikteldi. Olar Qazaqstannyń burynnan kele jatqan dostary ekeni belgili ári jobanyń strategıalyq seriktesteri atandy. Sondaı-aq, qazaqstandyq bastamany Fransýz ulttyq kitaptar ortalyǵy qoldady jáne atalmysh uıym ókilderi kitap sapasynyń syrtqy resenzenti bolady.
«Rýhanı jańǵyrý» baǵdarlamasyn júzege asyrý jónindegi ulttyq komısıa ondaǵan fransýz baspalaryn jáne strategıalyq seriktesterdiń usynystaryn qaraı otyryp, óner jáne ádebıetti dáripteý boıynsha aýdarma jáne baspa isinde 30 jyldan astam tájirıbesi bar Mıshel De Mol (Michel de Maule) baspasyn tańdaýdy uıǵardy. Onyń negizin salýshy jáne bas redaktory -tanymal fransýz lıngvısi, aqyn Terrı-de-la-Krýa (Thierry de La Croix). Memorandýmǵa qol qoıý kezinde baspashy ári ádebıetshi retinde jobanyń fransýz oqyrmanyna jańa mádenıetti ashatyn zor áleýetin baıqaıtynyn aıtty.
Parıjdiń Mádenı birlestiginiń prezıdenti madam Karla Orıgonı (Carla Arigoni) jobanyń akademıalyq mańyzdylyǵyn atap ótti.
Onyń pikirinshe, antologıa mátininiń ádebı jáne estetıkalyq qundylyqtan bólek zertteýshilik máni bar.
Qaýymdastyq jumysqa ádebıet, mádenıettaný jáne aımaqtaný salalarynyń bilikti mamandaryn tartýdy josparlap otyr. Olar fransýz oqyrmanyna Qazaqstan mádenıetin jan-jaqty ári kásibı túrde tanytatyn bolady. Joba aıasynda antologıany tek Fransıada emes, sondaı-aq, fransýz tili resmı túrde júretin nemese negizgi tilmen qatar paıdalanylatyn elderde taratý boıynsha úlken jumys atqarylǵaly otyr.
Álemde dál osyndaı elder sany ártúrli esepter boıynsha 50-den astam, 220 mıllıonnan kóp halyq fransýz tilin kúndelikti ómirde qoldanady. Qazaq ádebıetin atalmysh elderde keńinen tanytyp, damytýmen fransýz tilinde sóıleıtin elderdiń barlyǵyna tanymal «Prestıj Kommýnıkasıon» (Prestige Communication) jahandyq komýnıkasıalyq agenttigi aınalysady.
Halyqaralyq agenttiktiń bas dırektory Loran Taıb (Laurent Taieb) yntymaqtastyq ornatý memorandýmyna qol qoıý kezinde eldi mádenıeti, rýhanı jádigerleri men ishki damýy arqyly jahandyq álemde damytýǵa baǵyttaıtyn «Rýhanı jańǵyrý» baǵdarlamasynyń mańyzdylyǵyn erekshe atap ótti.
«Rýhanı Jańǵyrý» baǵdarlamasyn júzege asyrý boıynsha Qazaqstan Prezıdenti janyndaǵy Ulttyq komısıa hatshysy Aıda Balaeva qazaqstandyq taraptan memorandýmǵa qol qoıa otyryp, seriktesterdiń nazaryn aýdarmalardyń joǵary kórkemdik sapasy men jarıalanymdardyń estetıkalyq sapasyn qamtamasyz etýdiń mańyzdylyǵyna aýdardy.
Fransıadaǵy Qazaqstan elshiliginiń ǵımaratynda ótip jatqan kelissózderge Fransıadaǵy QR Elshisi Jan Ǵalıev jáne «Ulttyq aýdarma búrosynyń» dırektory Raýan Kenjehanuly qatysty.
