Atyraý oblysynyń ákimi Nurlan Noǵaev Fransıanyń Qazaqstandaǵy Tótenshe jáne Ókiletti elshisi Fılıpp Martıne bastaǵan fransýz delegasıasymen kezdesti.
Suhbattasý aldynda óńir basshysy fransýz delegasıasyn Fransıa quramasynyń Reseıdegi fýtboldan álem chempıonatyndaǵy jeńisimen quttyqtady. Sońǵy ret fransýzdar álem birinshiliginde 20 jyl buryn – 1998 jyly jeńip shyqqan edi.
Nurlan Noǵaev atap ótkendeı, búgingi kúni Atyraý oblysy Memleket basshysy qoıǵan strategıalyq mindetterdi iske asyrýdaǵy belsendi jáne júıeli is-qımyldardyń nátıjesinde serpindi damý ústindegi óńirlerdiń biri. Oblysta údemeli ındýstrıalyq-ınnovasıalyq damý aıasynda iri aýqymdy ınvestısıalyq jobalar iske asyrylýda. Qazirgi tańda óńir ekonomıkany ártaraptandyrý maqsatynda basqa baǵyttardy – agroónerkásiptik keshendi, densaýlyq saqtaý, týrızm salalaryn damytýda. – Memleket basshysy Nursultan Nazarbaevtyń elimizge sheteldik ınvestısıalardy, joǵary tehnologıalardy tartý, personaldardy álemdik standarttar boıynsha oqytý jónindegi tapsyrmasy bar. Osy baǵytta oblysymyzda birqatar ister atqaryldy, - dep erekshe atap ótti Nurlan Noǵaev. – Biz bıznesti damytý jáne ınvestısıalyq ahýaldy jaqsartý úshin barlyq jaǵdaılardy jasaımyz. Sizdiń elden kelgen kompanıalar birlesken jobalar qurý úshin barlyq qajetti kómekti ala alatynyna sendirgim keledi.
Atyraý oblysynyń Fransıamen syrtqy saýda aınalymy 2018 jyldyń birinshi toqsanynda 854,9 mln. AQSH dollaryn qurady, bul ótken jyldyń sáıkes kezeńine qaraǵanda 27,6%-ǵa artyq. Óńir aýmaǵynda fransýz kapıtalynyń qatysýymen 8 kompanıa jumys jasaıdy.
Óz kezeginde Fransıanyń Qazaqstandaǵy Tótenshe jáne Ókiletti elshisi Fılıpp Martıne oblys ákimimen eki el arasyndaǵy yntymaqtastyq boıynsha aldaǵy josparlarymen bólisti.
- Fransıa Qazaqstanmen tyǵyz yntymaqtastyq jasaıtyn elderdiń úshtigine kiredi. Osy jyly eki el arasyndaǵy strategıalyq yntymaqtastyq týraly shartqa 10 jyl bolady, - dedi Fılıpp Martıne. Bizdiń kompanıalarymyz sizdiń el aýmaǵyndaǵy kóptegen iri jobalarǵa qatysady. Biz jańa tehnologıalardy usynýǵa, Qazaqstan ekonomıkasynyń túrli salalary úshin kadrlar daıyndaýǵa qatysýǵa daıynbyz. Balamaly energetıkany, mádenı baılanystardy damytý, stýdentterdi Fransıanyń joǵarǵy oqý oryndaryna oqýǵa shaqyrý – bul eki el ekonomıkasyn biriktirýdiń bir bóligi ǵana.
Sonymen qatar fransýz elshisi kóptegen jobalardy iske asyrýǵa jáne Fransıa men Qazaqstan arasyndaǵy mádenı baılanystardy damytýǵa múmkindik beretin alda bolatyn qazaqstan-fransýz forýmy týraly da áńgimeledi.
Kezdesý sońynda oblys ákimi Nurlan Noǵaev óńirde ózara tıimdi yntymaqtastyqty jolǵa qoıýǵa bolatyn óte kóp salalardyń baryn aıta kele, Fransıa ókilderin Atyraý oblysyna jıi kelýge shaqyrdy.
