Qoǵam belsendisi Arýjan Saıyn Túrkistan oblysy Saryaǵash aýdany Abaı aýylynda zorlandy degen 7 jasar balanyń isine qatysty aqparat berdi. Bıyl naýryzda búkil Qazaqstandy dúrliktirgen is jabylǵan joq. Arýjan Saıynnyń aıtýynsha, tergeý jalǵasyp jatyr.

"Bala anasymen analar úıinde jatyr. Bizdiń komanda olarǵa barynsha kómektesip jatyr. Qurmanǵazy Músir Abaı aýylynan balanyń ájesimen birge júretin advokat izdep jatyr. Biraq ázirge tabylmady.

İs jabyq túrde júrip jatyr. Sondyqtan ondaǵy istiń mán-jaıyn bile almaımyz. Anasy men advokaty eshteńe aıtpaý týraly qujatqa qol qoıdy. Al tergeýshi meniń qońyraýlaryma jaýap bermeıdi. Onyń ústine men áý basta tergeý qyzmetiniń basshylyǵyna brıfıń ótkizý jaıly usynys tastaǵanmyn. Sebebi qazaqstandyqtardyń bári derlik balanyń taǵdyryna alańdap otyr. Halyqqa qurmet kórsetip, aqparattandyryp otyrý qajettigin jetkizdim.

Tipti ol bolmasa da, balanyń quqyǵyn qorǵaý máselesinde únsiz qalǵandar men poıyzdan túsirip alǵandar jáne taǵy basqa zıan keltirmek bolǵandarǵa qatysty istiń mán-jaıyn bilýge halyq quqyly. Bul máseleler kámeletke tolmaǵan balaǵa jasalǵan zorlyqqa qatysy joq, ol adamdar óz mindetterin zańǵa súıenip oryndaýy tıis edi.

Bizge berilgen bar aqparatty biz tergeý ornyna aparyp tapsyramyz. Máselen, Abaı turǵyndary taǵy bir qurbannyń bar ekenin aıtqanda biz bul týraly balalardyń quqyǵyn qorǵaý komıteti men tergeý qyzmetin habardar ettik. Eger qandaı da bir derekterińiz bolsa, maǵan jekege jazyńyzdar, biz tergeýshiler men advokattardyń nómirin beremiz", - dep jazdy Saıyn Facebook-tegi paraqshasynda.

Aıta keteıik, bıyl naýryzda «Abaı aýylynda jeti jasar bala zorlandy» degen aqparat búkil Qazaqstandy dúrliktirgen edi. Derekterge sáıkes, birinshi synypta oqıtyn balany 5 aı boıy ózinen 7-8 jas úlken tórt oqýshy zorlap kelgen. Balanyń ájesi tıisti organdarǵa birneshe márte júginse de, tyrp etip qozǵalǵan eshkim bolmady.

Bul is memleket basshysy Nursultan Nazarbaevtyń nazaryn ózine aýdardy. "Qaýipsizdik keńesiniń otyrysynda da memlekettik organdardaǵy problemalardy ashyq aıttym. Máselen, OQO-daǵy joǵary synyp oqýshylary zorlaǵan balanyń oqıǵasy. İs uzaqqa sozylyp, týǵan-týysqandaryn áýre-sarsańǵa saldy. Báribir de eshteńe taba almaı, dáleldeı almadyq. Nege ekenin bilesizder me? Barlyq jerde týysqandary otyrǵan. Bul ispen aınalysqan polıseıler de – týystary, joǵary organdarda da týystar, odan joǵaryda da – týystary, bári isti jabý úshin jasalǵan", — degen edi prezıdent "Nur Otan" partıasy saıası keńesiniń keńeıtilgen otyrysynda.