Búgin Astanadaǵy Ortalyq komýnıkasıalar qyzmetinde FIFA-2018 fýtboldan Álem chempıonatynyń qorytyndysyna arnalǵan baspasóz máslıhaty ótti. Sharaǵa «Qazaqstan» teleradıokorporasıasynyń Basqarma tóraǵasy Erlan Qarın jáne «Qazsport» telearnasynyń dırektory Pavel Sybýlın qatysty.
Brıfıń barysynda sóz alǵan Basqarma tóraǵasy Erlan Qarın: «Fýtboldan álem chempıonaty bul barlyq fýtbolsúıer qaýym úshin sport álemindegi mańyzdy da, qýanyshty oqıǵalardyń biri. Ózderińiz biletindeı, «Qazaqstan» jáne «Qazsport» telearnalary fýtbol oıyndarynyń barlyq 64 machyn tikeleı efırde kórsetti. Reseıdegi FIFA-2018 kórsetkishi 2014 jylǵy Álem chempıonatyna qaraǵanda 16% -ǵa artty. «Qazaqstan» telearnasynda eń kóp qaralǵan mach retinde Reseı - Egıpet quramalary arasyndaǵy tartys boldy. Oıynnyń úlesi 47,4% al, kórsetkishi 6,97 paıyzdy qurady. Condaı-aq, «Qasport» telearnasynda kórsetilgen Reseı-Horvatıa quramalarynyń oıyny úzdikter qataryna enip, 44,3% úlesimen 7,32% reıtıńtik kórsetkishke jetti. Al, eń tómengi reıtıń Shveısarıa - Kosta-Rıka arasyndaǵy mach boldy, úlesi 5,3%-dy qurasa, reıtıńisi 0,58%. Aıta ketý kerek, árbir machtyń ortasha aýdıtorıasy shamamen jarty mıllıonǵa jýyq kórermen jınady. Onyń ishinde kórsetilim jaǵynan eń joǵary kórsetkishke ıe bolǵan Reseı-Horvatıa oıynyn LIVE rejıminde 339 455 adam tamashalady. Al, Reseı-Saýd Arabıasy arasyndaǵy oıyndy bar-joǵy 16 819 adam qaraǵan. Sondaı-aq, kórermender fýtboldy «Qazaqstan TV» mobıldi qosymshasynan kórý múmkindigine ıe boldy, qazirgi sátte bul qosymsha 263 511 ret júktelgen. Taǵy bir jaqsy jańalyǵymyz, 2022 jyly Katarda ótetin fýtboldan Álem chempıonatyn translásıalaý quqyǵyna ıe boldyq», dedi.
Brıfıńke qatysqan «Qazsport» telearnasynyń dırektory Pavel Sybýlın fýtboldan Álem chempıonatynyń tikeleı efırdegi kórsetilimi joǵary deńgeıde bolǵanyn aıtady. «FIFA-2018 kórsetilimin joǵary deńgeıde ótkizdik dep oılaımyn, sebebi jaqsy pikirler aıtylyp jatty. 7 shildede «Qazsport» telearnasy ortasha táýliktik úlesi jaǵynan 18,3 paıyzdy kórsetip, absolútti rekord ornatty. Arnanyń reıtıńi 1,6%-dy qurady. Al, Reseı - Horvatıa machynda barlyq 6+ aýdıtorıasymen 1 018 910 kórermen jınap rekord ornatyldy. Kórermenderimiz tamasha oıyndardyń kýási boldy, bizdiń komentatorlarymyz barynsha atsalysty. Turaqty komentatorlardan bólek, Eseı Jeńisuly, Ermuhammed Máýlen, Sergeı Raılán jáne basqalary arnaıy shaqyrtyldy. Sondaı-aq, keıbir machtardy oqıǵa alańynan tikeleı jetkizý úshin Rýslan Baqytjan men Tımýr Súleımenov syndy bilikti mamandar boldy. Osy sharany qorytyndylaı kele, eń úzdik komentatordy anyqtaý úshin baıqaý jarıalaýdy uıǵardyq. Baıqaý áleýmettik jelilerde korporasıamyzdyń barlyq akkaýnttarynda jarıalanǵan bolatyn. 14 komentatordyń arasynan Ermuhammed Máýlen men Eseı Jeńisuly, Sergeı Raılán jáne Tımýr Súleımenov eń kóp daýys jınap, úzdik komentator atandy. Sondaı-aq, «Qazaqstan» teleradıokorporasıasynyń atyna sapaly jumysy úshin FIFA-dan Alǵys hat jiberildi. Bul týrnırdi oıdaǵydaı ótkizýimizdiń bir sebebi, qyzmetkerlerdiń jumyla jumys isteýiniń arqasynda. Barlyqtaryńyzǵa alǵysymdy bildiremin»,- dedi telearna dırektory. Esterińizge sala keteıik, 14 maýsym - 15 shilde aralyǵynda Reseıde fýtboldan Álem birinshiligi ótken bolatyn. Bul jarysqa álemniń eń tańdaýly 32 ulttyq quramasy qatysty. FIFA-2018-diń Qazaqstan Respýblıkasy aýmaǵyndaǵy resmı habar taratýshylary - «QAZAQSTAN» jáne «QAZSPORT» telearnalary boldy.
