Almatyda Shyǵys aınalma jolynda kólik qaǵyp ketken bala palataǵa aýystyryldy. Bul týraly Tengrinews.kz portaly habarlady.
Balalar jedel medısınalyq járdem ortalyǵyndaǵy bas dárigerdiń orynbasary Dinmuhamed Rýzýddınovtiń aıtýynsha, bala neırohırýrgıa bólimindegi palataǵa aýystyryldy.
"Qazirgi ýaqytta balanyń jaǵdaıy turaqty aýyr dep baǵalanyp otyr. Búgin ony neırohırýrgıa bólimine aýystyrdyq. Bala anasymen birge jatyr. Sóıleı alady, tamaq ishe alady. Barlyq qajetti emdi alyp jatyr. Biraq bala áli de álsiz. Onyń qansha ýaqytta qalpyna keletinin aıtý óte qıyn. Bala ashyq bas mı jaraqatyn aldy, ota jasaldy", - dedi dáriger.
Onyń boljaýynsha, bala 2-3 aptada aýrýhanadan shyǵarylady. Endi ol osy ýaqyt aralyǵynda em alady, vıtamın qabyldaıdy. Al balanyń anasy Azıza Askar-oǵly uly Muhammedtiń áli sóıleı almaıtynyn aıtady.
"Ázirshe sóıleı almaıdy, dárigerler qalpyna kelý úshin ýaqyt qajet ekenin aıtady. Qazir ol suraqtarǵa qoıǵanda, qarap, kúlip qoıady. Kóńil-kúıi ózgerip turady, keıde jylap jiberedi de. Biraq ózdiginshe tamaqtana alady", - deıdi.
Sondaı-aq, anasy oqıǵanyń qalaı bolǵanyn aıtyp berdi.
"Bala aýlada júrgen bolatyn. Men ony kúıeýimmen júrgen shyǵar dep oıladym. Biraq ol jumysqa ketip qalǵan bolyp shyqty. Balanyń qasynda men boldy dep oılaǵan. Biraq ulymyz kenetten joq bolyp ketti. Ony aıaldamaǵa deıin izdep bardym. Sosyn polısıaǵa habar berdim. Olar bolsa sol jerde jol apaty bolǵanyn aıtty. Biz artynsha sonda bardyq", - deıdi zardap shekken balanyń anasy.
Osy jaǵdaıǵa deıin Muhammed balabaqshaǵa baryp júrgen eken.
Eske salaıyq, osyǵan deıin Shyǵys aınalma avtojolynda balany kólik qaǵyp ketkeni týraly habarlanǵan edi. Áleýmettik jelide taraǵan málimetke sáıkes, "balany kórpege orap, Bránskaıa kóshesindegi aǵashtyń túbinde tastap ketken".
Alaıda jol apaty bolǵan jer bala tabylǵan jerden alysyraq bolǵan. Dárigerlerdiń aıtýynsha, bala úshinshi deńgeıli koma jáne tórtinshi deńgeıli travmatıkalyq shok alǵan jaǵdaıynda balalarǵa shuǵyl járdem kórsetý ortalyǵyna túsken. Oǵan jedel ota jasalǵan.
Al keıinirek oqıǵanyń vıdeosy jarıalanǵan edi.
