Qyz alyp qashýdy ulttyq dástúrge jatqyzyp, aqtaıtyndardy túsinbeımin. Ertede qazaq kóńili súıgenimen quda bolyp, aıttyryp, qalyń berip, qalyń alyp baryp qyz bergen, kelin túsirgen. Keıde maly kópter kedeıdiń qyzyn qalyńmalǵa matap, kishilikke alǵan. Sondaıda ǵana mosqal adamǵa qyzdyń tıgisi kelmegende amaldyń joqtyǵynan jigit pen qyz birin biri unatyp turǵanda baryp alyp qashqan. 
Bata buzylýdyń aıybyn rý bolyp kóterip, araǵa bıler bıligi júrip, úlken daý bolyp basylǵan. Qyz alyp qashý dástúr emes, amalsyzdyqtan jasalǵan shara. 
Sondyqtan jigitter, qazaq qyzynyń obalyna qalyp, kóz jasyn tókpeı, dástúr janashyry retinde jalǵastyrǵylaryń kelse attastyrýdy jańǵyrtyp, zorlyqpen basyp alýdy qoıyńdar.
Jelide alyp qashqan kelinniń joǵalǵanyn oqydym. Gúlmıra Ábiqaıdyń feısbýk paraqshasyna kirip kórińizder, nanbasańyzdar. Ol mynandaı jazba qaldyrypty:
"KELİN JOǴALDY!!!!
Kúıeýi ólimshi qylyp sabap, tańǵy 6-da úıden shyǵyp ketkenine búgin tórtinshi kún. Sodan beri Jansaıany kórdim-bildim degen adam joq. Jasy 19-da. 7 aı buryn kórshi aýyldyń balasy alyp qashty. Eki aıdan soń tórkinine kókala qoıdaı bop aıaǵy synyp keldi, úsh aıdan soń qoly shytynap taǵy keldi. Bul joly úshinshi ret kelgende "kelin bolǵan jerden túńildim" dep kesip aıtty. Shymkenttik jeńgeler qoısyn ba, sońǵy ret dep túndeletip kúıeýine qaıta qosty. Tańǵy altyda enesi, kúıeýi bári tósek sıpap qaldy. Jas kelin belgisiz jaqqa ketken kúıi joq. Búgin tórtinshi kún, oqıǵa Túrkistan oblysy, Sozaq aýdanynda oryn aldy. Jansaıa dál osy kúıde úıden bezip shyqqan, aq jaýlyqty kelinshekti kim kórdi?"

Anar Tóleýhanqyzy