QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jaryqqa shyǵarǵan «Altynemel» derekti fılmi QHR-nyń Taıchjoý qalasynda ótken Kıno jáne týrızm salasyndaǵy azıalyq óner aptalyǵynda «Sheteldiń úzdik derekti fılmi» júldesimen marapattaldy, dep habarlaıdy Qamshy.kz aqparat agenttigi. 

Altynemel memlekettik ulttyq saıabaǵynyń baı tabıǵaty týraly baıandaıtyn derekti fılmniń avtory tanymal fotograf-natýralıst Oleg Belálov.  

Aıta ketsek, «Altynemel» derekti fılmi rejıserdiń alǵashqy jumysy. Sondaı-aq Oleg Belálov bul kartınanyń senarı avtory jáne qoıýshy operatory.

Esterińizge sala ketsek, byltyr qarasha aıynda «Qazaqfılm» kınostýdıasy QR Tuńǵysh Prezıdenti-Elbasy qorymen birlesip, Qazaq derekti kınosynyń kúnderi aıasynda «Altynemel» derekti fılmniń kórsetilimi ótken bolatyn.

Kıno jáne týrızm salasyndaǵy azıalyq óner aptalyǵynyń uıymdastyrýshylary: Qytaıdyń televızıalyq sýretshiler qaýymdastyǵy, Chjeszán baspa, radıo, kıno jáne televızıa ákimshiligi jáne Taıchjoý úkimeti. Mádenı is-shara Azıa elderinde týrızmniń jáne kınematografıa salasynyń damýyna baǵyttalǵan. Bıyl atalǵan sharaǵa Fransıa, Reseı, Qazaqstan jáne Japonıa syndy 23 memleketterden myńnan astam kıno jáne telebaǵdarlamalar qatysqan. 

«Altynemel»

Altynemel ulttyq tabıǵı saıabaǵynyń ereksheligi nede? Qurylǵaly beri 20 jyldyń ishinde ne ózgerdi? Týrıser bul aımaqqa neni kórý úshin barýy tıis? Tabıǵaty baı Altynemel saıabaǵyn zamanaýı tehnıkanyń kómegimen túsirilgen ádemi fılmdi tamashalaı alasyz.

Altynemel - Jetisý Alataýynyń ońtústik silemderiniń arasynda ornalasqan ulttyq tabıǵı saıabaq. Jer kólemi - 520 myń gektar. Saıabaq aýmaǵynda týrıserdi qatty qyzyqtyratyn biregeı tabıǵı qurylymdar jáne baıyrǵy tarıh eskertkishteri ornalasqan. Shatqaldarynda ejelgi adamdardyń tasqa qashap salǵan sýretterin kórýge bolady. Qapshaǵaı memlekettik ańshylyq sharýashylyǵy negizinde 1996 jyly quryldy.