2018 jylǵy 1 tamyzdan bastap «Habar» agenttigi «Junior Eurovision Song Contest» halyqaralyq án baıqaýyna qatysý úshin úmitkerlerdiń respýblıkalyq irikteýin bastaıdy.

Ótinimderdi qabyldaý www.khabar.kz saıtynda 2018 jylǵy 31 tamyzǵa deıin jalǵasady.

Qatysý úshin úmitker onlaın-saýalnamany toltyrýy, óz ánin, fotosýretin, týý týraly kýáliginiń skanerlengen kóshirmesin, ata-anasynyń/qamqorshysynyń baıqaýǵa qatysýǵa bergen ruqsatnamasyn, sondaı-aq ánniń avtorlyǵy týraly ótinishin júkteýi qajet.

Sondaı-aq baıqaýǵa 6 adamǵa deıingi ujymdar da qatysa alady. Top qatysýshylary úshin de qoıylatyn talaptar birdeı.

2018 jylǵy 7 qyrkúıekte «Habar» agenttigi Respýblıkalyq irikteýdiń birinshi kezeńinen ótken fınalısterdiń esimderin habarlaıdy.

2018 jylǵy 22 qyrkúıek kúni fınalıster «Habar» telearnasynda tikeleı efırde ótetin gala-konsertke qatysady. Jeńimpaz kórermenniń daýys berýi arqyly anyqtalady.

Respýblıkalyq irikteýdiń jeńimpazyn 2018 jyly 25 qarashada Mınskte ótetin fınalǵa daıyndyq kútedi. Qatysýshyny Mınsktegi baıqaýǵa daıyndaýmen «Habar» Agenttigi aınalysady.

«Junior Eurovision Song Contest» halyqaralyq án baıqaýy 9 jastan bastap 14 jasqa deıingi oryndaýshylar qatysatyn «Evrovıdenıeniń» analogy. 15 jyldyq tarıhy bar baıqaýǵa elimiz alǵash ret qatysqaly otyr. Dúbirli dodany Qazaqstan aýmaǵynda «Habar» telearnasy translásıalaıdy. «Habar» Agenttigi 2016 jylǵy 1 qańtardan bastap is-sharany uıymdastyratyn Eýropalyq habar taratý odaǵynyń (EBU) qaýymdasqan múshesi bolyp tabylady, bul múshelik atalǵan baıqaýǵa qatysý úshin elden úmitker usynýǵa múmkindik berdi.

Bıyl jarysqa 19 el qatysady, bul jarys tarıhyndaǵy rekordtyq kórsetkish. Olardyń qatarynda Albanıa, Armenıa, Avstralıa, Ázirbaıjan, Belarýs, Fransıa, Makedonıa, Grýzıa, Irlandıa, Izraıl, Italıa, Qazaqstan, Malta, Polsha, Portýgalıa, Reseı, Serbıa, Nıderlandy, Ýels bar. Qazaqstanmen  qatar Ýels úshin de bıylǵy baıqaý debútti bolmaq.