Aǵymdaǵy jyly Astana Hub úsh aılyq jedeldetilgen baǵdarlamanyń birinshi legin iske qosyp, búgingi tańda 4 joba jumystaryn sátti aıaqtady. Bul týraly «Astana Hub» bıznes-sarapshysy Dáýlet Aıtmahanov Elorda Info tilshilerine bergen suqbatynda málimdedi.
Startaptar – tehnologıalyq bıznestegi ınovasıanyń skaýttary, sondyqtan olar úshin qolaıly jaǵdaı jasaý jáne olardy qoldaý Astana Hub-tyń basty maqsaty. Qazirgi kezde Astana Hub-ta 25 adam jumys jasaıdy.
«Jyl basynda qolǵa alynǵan 14 jobanyń 10-y ári qaraı jumystaryn jalǵastyrýda. Osy joly 17 joba akseleratorda, al 50 joba ınkýbatorda. Jyl sońyna deıin jobalarmen osy qalypta jumys jasaý josparlanyp otyr», – dedi Dáýlet Aıtmahanov.
Bastapqyda jedeldetýge baǵyttalǵan baǵdarlamaǵa 90-ǵa jýyq ótinim kelip tústi, onyń ishinde qazaqstandyq jobalar jáne kórshiles úsh elden Reseı, Tájikstan jáne Ózbekstannan ótinimder boldy. Baǵdarlamaǵa ınkýbator bolyp 360 komanda qatysqysy keldi.
«Biz jaı ǵana ıdeıamen usynylǵan jobalardy qabyldamaımyz, oǵan qaraǵanda quramynda jumys jasaıtyn birneshe adamy bar, atqarylǵan jumys kólemi bar jobalarmen jumys jasaımyz. Rezıdentterdiń orta jasy 22-27 jastaǵy azamattar. Osy kúzden bastap joǵarǵy oqý orynyn endi ǵana bitirgen nemese stýdenttermen jańa ónim shyǵarýdy josparlap otyrmyz. Sondaı-aq, bizdiń quramda 30-ǵa taıap qalǵan startaperler de bar. Olar óz jumystaryna beıjaı qaramaıdy, baıyppen júıeli túrde bızneske jaqyndap keledi», – deıdi D. Aıtmahanov.
Kompanıada tehnologıalyq kásipkerler úshin qolaıly ekojúıeni qurýǵa kómektesetin 8 baǵyt jumys jasap tur. Ónimderdiń biri akselerator – bul úsh aılyq qarqyndy baǵdarlama, onyń maqsaty qazirdiń ózinde bar jobalardy damytýdy jedeldetý. Odan basqa ınkýbator bar, ol alty aıǵa sozylǵan jedeldetilgen baǵdarlama.
«Bul neǵurlym pasıvti baǵdarlama bolyp tabylady, onyń maqsaty - startaptardy jedeldetýge akseleratorlaýǵa daıyndaý jáne olardy qajetti jaǵdaılarmen qamtamasyz etý», – dep túsindirip ótti ol.
Baǵdarlamaǵa qatysýshylarǵa arnalǵan kompanıa ornalasqan EHRO-2017 halyqaralyq kórmesi ǵımaratynda 2-5 adamǵa arnalǵan jumys alańy ornalasqan. Odan ózge Reseıden shaqyrylǵan spıkerlermen jáne sarapshylarmen aptalyq oqytý semınarlary ótkizilip otyrady.
Aıta ketelik, semınarǵa qatysýshylar akseleratordyń qatysýshylary bolyp tabylady, sebebi akselerator aqyly baǵdarlama bolsa, ınkýbator tegin. Iaǵnı, aqyly baǵdarlamaǵa kóbirek nazar aýdarylady, tek Qazaqstandyq emes, Reseıden óte bilikti sarapshy mamandar shaqyrtylady. Kórshi elderden sarapshylardyń kelýi, qazirgi kezde elimizdegi IT salasy mamandarynyń tapshylyǵynan oryn alyp otyr.
