Murat Asqaroǵly sotta sanksıa jaıly aıtylyp jatqanda jylap jiberdi, - dep habarlaıdy Tengrinews.kz.
1985 jylǵy er adamnyń beton zaýytynda jumys isteıtini belgili boldy. Úılengen, eki uly bar. Osyǵan deıin sotty bolmaǵan. Ol QR Qylmystyq kodeksiniń 106-baby boıynsha ("Densaýlyqqa qasaqana aýyr zıan keltirý") qylmys jasady degen kúdikke ilinip otyr.
Prokýror Aıan Aqberdıev sottan bultartpaý sharasy retinde eki aıǵa qamaýǵa alýdy surady.
Murat Asqaroǵly óz kezeginde bultartpaý sharasy retinde eshqaıda ketpeý týraly qolhatty tańdaýdy surady. Osy ótinishinen keıin ol jasaǵan áreketine ókinetinin aıtyp, jylap jiberdi.
"Qylmystyq aýyr ekenin eskere otyryp, sýdıa bultartpaý sharasy retinde eki aıǵa qamaýǵa alý týraly sheshim qabyldady. Ótinish qanaǵattandyryldy", - dedi mamandandyrylǵan aýdandyq tergeý sotynyń sýdıasy Maral Jarylǵasova.
Al Murat Asqaroǵlynyń advokaty Amangeldi Sarıev óz kezeginde qorǵalýshysyna qatysty sot-psıhıatrlyq saraptama júrgizýshi týraly ótinish aıtatynyn málimdedi.
"Maǵan qujattardy berse, men ot-psıhıatrlyq saraptamanyń taǵaıyndalýyn ótinemin. Saraptama nátıjesi oń bolsa, ony zańǵa sáıkes, májbúrli túrde em alýǵa jiberedi", - dedi advokat.
Keshe Almaty qalalyq İİD basshysy Serik Kúdebaevtiń ákesiniń týystarymen kezdeskeni aıtylǵan edi.
"Men jınalǵandarmen ózim jeke sóılestim. Konstrýktıv dıalog boldy, suraqtar qoıyldy, suraqtarǵa rastalǵan jaýaptar berildi. Murat Asqaroǵlynyń týystary onymen kezdeskisi keletinin aıtty. Olarǵa bul múmkindik berildi: olar Departamenttiń ǵımaratynda kóristi. Murat olarǵa sol kúni ne bolǵanyn aıtyp berdi. Sol kezdesýden keıin barlyǵy tarady", - degen edi Almaty qalalyq İİD basshysy Serik Kúdebaev.
Polısıa ókilderi jınalǵandardyń tarapynan qoǵamdyq tártip buzýshylyq tirkelmegenin aıtyp ótti.
Sondaı-aq, munyń aldynda Almaty densaýlyq saqtaý basqarmasyndaǵylar Shyǵys aınalma avtojolynda tabylǵan balanyń jaǵdaıyn aıtyp bergen bolatyn. Dárigerlerdiń málimetinshe, búgin balanyń jaǵdaıynda oń ózgeris baıqalǵan.
Eske sala keteıik, osyǵan deıin Almatydaǵy Shyǵys aınalma avtojolynda essiz kúıde tabylǵan 4 jasar Muhamad Asqaroǵlyny óz ákesi taspen urǵany anyqtalǵan edi. Balanyń ákesi Murat Asqaroǵly bul qylmysty ózi jasaǵanyn moıyndap, mas kúıde bolǵanyn aıtqan bolatyn.
