Semeıdiń orta mektep ustazdaryna robototehnıka kabınetterinde jumys jasaý boıynsha kýrs júrgizilýde.
SHQO-da orta mektep ustazdary robototehnıka jáne IT-tehnologıalarymen zamanaýı kabınetterinde jumys jasaý boıynsha biliktilik arttyrý kýrstarynan ótýde.
Jazǵy demalys aıaqtalǵanǵa deıin oblysta 544 muǵalim atalǵan kýrstan ótedi. «Nur Otan» partıasynyń bastamasymen qolǵa alynǵan bul joba boıynsha jańa oqý jylynda Shyǵys Qazaqstan oblysynyń 277 mektebinde robototehnıka jáne IT-tehnologıalar kabınetteri ashylady.
«IT-tehnologıalarǵa arnaıy baǵdarlama boıynsha oqytý máselesi alǵa qoıylǵan tusta iri kompanıalardan kóptegen usynystar túsýde. Semeıdegi Elektrotehnıkalyq kolejdiń mamandary daıarlaǵan «Junior training» kýrsynyń avtorlyq baǵdarlamasy - usynylǵan nusqalardyń ishindegi eń úzdigi atandy», – dedi oblys ákiminiń orynbasary Ásem Núsipova.
Semeı elektrotehnıkalyq kolejiniń dırektory Azat Sarbekovtyń aıtýynsha, kýrstyń basty ereksheligi – halyqaralyq tájirıbege negizdele otyryp, Shyǵys Qazaqstan mektepteriniń múmkindikterine qaraı oraılastyrylyp jasalǵan.
Bes aptaǵa josparlanǵan kýrstyń 3 aptasy baǵdarlamanyń teorıasyn oqýǵa, al qalǵan 2 apta ustazdardyń alǵan bilimderi men daǵdylaryn óz betterimen tájirıbe negizinde kórsetýine arnalady.
«Biz ár oqýshyny IT-tehnologıalar salasyndaǵy maman qylýdy maqsat tutpaımyz. Alaıda, zaman talaby sol bolǵandyqtan, Qazaqstannyń kez kelgen azamaty sıfrlandyrý jáne IT-tehnologıa negizderin bilgeni jón. Balalar kishkentaı kezinen qarapaıym ómirde qajet bolatyn tehnologıalardy ıgeretin bolady. Budan bólek, bul sabaqtar oqýshylardyń analıtıkalyq oılaý qabiletin arttyryp, shetel tilderin ońaı meńgerýge yqpalyn tıgizedi. Alaıda, balalarǵa sapaly bilim berip, boılarynda qajet daǵdyny qalyptastyrý úshin, aldymen jalpy bilim beretin mektep ustazdaryn úıretip alý kerek», – dedi Á. Núsipova.
Mektep muǵalimderiniń aıtýynsha, osyndaı biliktilik arttyrý kýrstaryn júrgizý aldaǵy ýaqytta sapaly bilim berýge yqpalyn tıgizedi.
«Oqytýshylar úshin bul óte paıdaly, sebebi biz robototehnıka jáne túrli zamanaýı tehnologıalarmen jumys jasaǵanda biliktiligimizge senimdi bolamyz. Mektepterdegi rabototehnıka kabınetteri oqýshylardyń súıikti synyptary bolady degen oıdamyn», – dep tájirıbe almasý kýrsy boıynsha óz pikirin Glýbokoe aýdany, Berezovka orta mektebiniń matematıka muǵalimi Elena Berdáeva bildirdi.
