QR Syrtqy ister mınıstrliginiń ókilderi AQSH-ta alaıaqtyq jasady degen kúdikpen ustalǵan qazaqstandyq úsh qyzǵa qatysty pikir bildirdi, - dep habarlaıdy Tengrinews.kz.

"Iá, biz qyzdardyń ustalǵanyn rastaımyz. Ustalǵandardyń ishinde Qazaqstannyń úsh azamatshasy bar. Ekeýi qazir qamaýda, al bireýi densaýlyǵyna baılanysta qaladan ketpeý týraly qolhatpen jiberildi. Nú-Iorktiń Ońtústik okrýginiń prokýrorynyń ótinishi boıynsha olar 20 jyldan 30 jylǵa deıin bas bostandyǵynan aıyrylý múmkin", - dep habarlady QR SİM resmı ókili Aıbek Smadıarov.

Onyń aıtýynsha, Nú-Iorktegi Qazaqstan konsýldyǵynyń ókilderi AQSH-ta ustalǵan azamatshalardyń zańdy múddeleri men quqyqtaryn qorǵaý boıynsha qajetti barlyq konsýldyq-quqyqtyq kómekti kórsetip jatyr.

QR SİM resmı ókili 1994, 1991 jáne 1970 jylǵy úsh azamatshanyń ustalǵanyn aıtty.

"Bul AQSH-taǵy iri alaıaqtyq boldy. 25 adam ustaldy. Rarıtetti kólikterdi satýmen aınalysqan alaıaqtardyń isi, keltirilgen shyǵynnyń jalpy somasy - 4,5 mıllıon dollar", - dedi Smadıarov.

RIA Novostı málimetinshe, shilde aıynyń sońynda AQSH-tyń Ádilet mınıstrliginiń ókilderi Federaldy qaýipsizdik búrosy ókilderiniń 25 adamnyń kólik satýda alaıaqtyq jasady dep aıyptalyp jatqanyn habarlady.

Ońtústik okrýgtiń prokýratýrasynyń málimetinshe, qylmystyq toptyń quramynda Reseıdiń jeti azamaty, Grýzıanyń bes azamaty, Ázirbaıjannyń tórt azamaty jáne Qazaqstannyń úsh azamaty, Latvıanyń eki týmasy, Ýkraınanyń eki azamaty bolǵan. Sondaı-aq, aıyptalǵandardyń ishinde AQSH pen Túrkıa azamattary bar.

Eske sala keteıik, osyǵan deıin úsh qazaqstandyq pen taǵy 22 adamnyń AQSH-ta kólikterdi satyp, iri kólemdegi alaıaqtyq jasady dep aıyptalyp jatqany habarlanǵan bolatyn.

Prokýratýra málimetinshe, osy istegi árbir fıgýrant 30 jylǵa deıin bas bostandyǵynan aıyrylýy múmkin. Sondaı-aq, aqsha jymqyrý maqsatynda aldyn ala kelisimge kelip jumys istegenderi úshin árqaısysy 20 jylǵa sottalýy múmkin ekeni aıtylady.